Hoffenheimi jep detaje për mungesën e Fisnik Asllanit pas transferimit të parealizuar te Leipzigu

Kanë kaluar afro tri javë nga dështimi i kalimit të Fisnik Asllanit te Leipzigu, ndërsa e ardhmja e sulmuesit kosovar dhe gjendja e tij vazhdojnë të ngrenë pikëpyetje.

Transferimi ishte shumë pranë përfundimit, por u anulua pasi Leipzigu shprehu shqetësime gjatë ekzaminimeve mjekësore. Në atë periudhë, Hoffenheimi u përpoq ta ulte rëndësinë e situatës dhe njoftoi se 24-vjeçari pritej t’i kthehej shpejt stërvitjeve.

Por rikthimi nuk ndodhi në kohën e parashikuar. Asllani mungoi në sfidën e parë të Hoffenheimit në Kupë dhe nuk luajti as në ndeshjen hapëse të Bundesligës kundër Kolnit, raporton Kicker.

Mungesat e tij kanë shtuar dyshimet për gjendjen fizike të futbollistit, veçanërisht pasi shqetësimet mjekësore ishin arsyeja kryesore e ngritur nga Leipzigu për prishjen e marrëveshjes.

Ilzer: Asllani duhet të rikthehet me kujdes

Trajneri i Hoffenheimit, Christian Ilzer, sqaroi se sulmuesi duhet ta rrisë gradualisht intensitetin dhe të rikthehet hap pas hapi në ngarkesat e plota.

“Do të duhet ende pak kohë për Fisin. Ngarkesa e tij do të rritet gradualisht dhe do të futet në stërvitjen e ekipit”, deklaroi Ilzer.

Sipas trajnerit austriak, Asllani ka pasur një problem me një masë indi dhjamor në pjesën e përparme të gjurit, çka ka ndikuar në procesin e rikuperimit dhe rikthimit të tij.

“Gjithçka është në rregull. Ai gradualisht do ta rrisë ngarkesën e punës dhe do të marrë pjesë më shumë në stërvitjen e ekipit”, shtoi Ilzer.

Schicker shpjegon mungesën e Asllanit në përgatitje

Drejtori sportiv Andreas Schicker foli gjithashtu për situatën e reprezentuesit të Kosovës. Ai theksoi se Asllani nuk e zhvilloi të plotë fazën përgatitore, pasi ishte planifikuar transferimi i tij, ndaj Hoffenheimi po e menaxhon rikthimin me kujdes.

“Ai nuk mori pjesë plotësisht në fazën parasezonale për shkak të transferimit të planifikuar. Prandaj, po e rikthejmë me një menaxhim të kujdesshëm të ngarkesës dhe po i japim kohën që të tjerët kanë pasur tashmë. Përveç kësaj, sezoni nuk vendoset në shtator”, tha Schicker.

Schicker shtoi se klubi po bashkëpunon vazhdimisht me ekipin mjekësor, në mënyrë që Asllani të rikthehet në stërvitje të plotë në mënyrë progresive.

Megjithatë, Hoffenheimi ende nuk ka sqaruar nëse problemi i gjurit është i njëjti shqetësim që ndikoi në dështimin e transferimit te Leipzigu.

Për momentin, Asllani vazhdon të jetë jashtë skuadrës së Hoffenheimit dhe rikthimi i tij i plotë nuk pritet të ndodhë menjëherë. Klubi gjerman këmbëngul se situata po trajtohet me kujdes dhe se sulmuesi kosovar do të rikthehet gradualisht në ritmin e ekipit.