Galatasaray interesohet për Fisnik Asllanin, shqyrtohen të dhënat e tij mjekësore

Fisnik Asllani mund të përfshihet në një tjetër transferim të rëndësishëm gjatë këtij afati kalimtar.

Sulmuesi kosovar i Hoffenheimit i është propozuar Galatasarayt, ndërsa gazetari turk Haluk Yürekli ka raportuar se klubi nga Stambolli po analizon raportet mjekësore të futbollistit.

Gjendja fizike e 24-vjeçarit është diskutuar gjerësisht në javët e fundit, veçanërisht pas dështimit të kalimit të tij te RB Leipzig në fillim të këtij muaji.

Leipzigu kishte gjetur marrëveshje me Hoffenheimin për transferimin e Asllanit për afërsisht 25 milionë euro. Megjithatë, pas ekzaminimeve mjekësore, klubi gjerman shfaqi shqetësime dhe hoqi dorë nga përfundimi i operacionit.

Pavarësisht kësaj, Hoffenheimi ka vazhduar ta mbështesë lojtarin, duke bërë të ditur se ka besim në kapacitetet e tij fizike dhe sportive.

Tani, sulmuesi është shfaqur në orbitën e Galatasarayt, kampionit të Turqisë që po punon për të përforcuar repartin e sulmit.

Sipas të dhënave të publikuara nga Yürekli, dokumentet mjekësore të Asllanit po shqyrtohen nga klubi turk. Mbetet për t’u parë nëse Galatasaray do të bëjë hapin e radhës dhe do të paraqesë një ofertë konkrete për reprezentuesin e Kosovës.

Asllani luan si sulmues qendror dhe sezonin e kaluar ishte ndër lojtarët më të rëndësishëm të Hoffenheimit. Ai u aktivizua në 35 ndeshje, në të cilat shënoi 21 gola dhe dha asistime, duke ndihmuar ekipin të siguronte kualifikimin në Ligën e Evropës.