Haaland i mahnitur nga rrugëtimi i Norvegjisë: çerekfinalja e Botërorit 2026, më shumë se sa kishte imagjinuar

Erling Haaland ka rrëfyer se ecuria e Norvegjisë deri në çerekfinalet e Kupës së Botës 2026 e ka surprizuar edhe atë vetë, ndërsa përfaqësuesja nordike ndodhet vetëm një fitore larg hyrjes mes katër skuadrave më të mira të turneut.

Para duelit çerekfinal ndaj Anglisë, sulmuesi norvegjez pranoi se një skenar i tillë me kombëtaren e tij nuk i kishte shkuar kurrë në mendje.

“Absolutisht nuk e prisja fare këtë. E kam thënë shumë herë më parë, madje edhe para ndeshjes me Brazilin nuk e prisja. Nuk e prisja që të ishim në çerekfinale me Norvegjinë në Kupën e Botës. Është mjaft e habitshme edhe për mua”, deklaroi Haaland.

Sulmuesi i Manchester Cityt bëri të ditur se rrugëtimi historik i Norvegjisë në këtë Botëror ka shkuar përtej çdo pritshmërie që kishte, madje kjo ndodhi edhe para triumfit të madh përballë Brazilit.

Haaland e konsideron praninë në Kupën e Botës si një prej çasteve më të rëndësishme të karrierës së tij, duke vënë në pah se sa shumë do të thotë për të të përfaqësojë vendin në skenën më të madhe të futbollit.

“Të jesh në gjendje të luash në Kupën e Botës është një nder dhe një qëllim i madh për mua. Të jem këtu dhe të luaj në skenën më të madhe me miqtë e mi norvegjezë kundër ekipeve më të mira në botë është vërtet diçka e veçantë”, shtoi ai.

Suksesi ndaj Brazilit në fazën me eliminim direkt u kthye në një çast historik për Norvegjinë, ndërsa Haaland pranoi se edhe vetë futbollistët e kishin të vështirë ta besonin atë që po realizonin.

“Të luanim kundër Brazilit ishte paksa e çmendur për ne norvegjezët. Të fitojmë ndaj Brazilit dhe më pas të luajmë kundër Anglisë në çerekfinale të Kupës së Botës në SHBA është diçka shumë e veçantë”, tha sulmuesi.

Tashmë Norvegjia po përgatitet për provën më të madhe të këtij edicioni, ndeshjen ndaj Anglisë, ku Haaland dhe bashkëlojtarët e tij synojnë ta zgjasin një nga rrëfimet më të bukura të këtij Botërori.