Pse Erling Haaland shfaqet si “Braut Haaland” me fanellën e Norvegjisë?

Erling Haaland ishte mes figurave kryesore të Kupës së Botës 2026, teksa e ndihmoi Norvegjinë të arrinte deri në çerekfinale falë shtatë golave të tij, një shifër e barabartë me atë të Harry Kane dhe Lionel Messi.

Përtej asaj që ka treguar në fushë, vëmendjen e tifozëve e ka tërhequr edhe një veçanti në fanellën e sulmuesit të Manchester Cityt.

Ndërsa te klubi anglez ai paraqitet thjesht me mbiemrin “Haaland”, te përfaqësuesja norvegjeze zgjedh të mbajë emrin “Braut Haaland”.

Kjo zgjedhje lidhet drejtpërdrejt me prejardhjen e tij familjare dhe nuk është bërë rastësisht.

“Braut” është mbiemri i nënës së tij, Gry Marita Braut, dhe futbollisti e përdor për të nderuar degën familjare nga ana e saj. Në fakt, emri i tij i plotë ligjor ka qenë gjithmonë Erling Braut Haaland.

Në Norvegji, përdorimi i emrit të mesëm si një mbiemër familjar i trashëguar është një praktikë e zakonshme, që shërben për të ruajtur lidhjen me familjen e njërit prej prindërve.

Zgjedhja përbën edhe një vlerësim për nënën e tij, e cila gjatë viteve 1990 u shpall kampione e Norvegjisë në heptatlon.

Në të vërtetë, kjo nuk është hera e parë që ai identifikohet si “Braut Haaland”. Në fazat e para të karrierës, sulmuesi njihej me këtë emërtim, para se në nivel klubesh ta reduktonte në “Haaland”.

Një ndryshim tjetër me peshë erdhi në vitin 2019, pas transferimit nga Molde te Red Bull Salzburg. Deri në atë moment ai përdorte formën “Håland”, por më pas zgjodhi ta shkruante “Haaland”, me bindjen se kështu emri i tij do të njihej më lehtë në arenën ndërkombëtare.

“Një hap përpara, gjatë gjithë kohës”, ishte shpjegimi që dha Haaland për atë vendim./