Gyokeres lëshon sinjal të fortë pas triumfit ndaj Tunizisë: Kjo është Suedia e vërtetë

Viktor Gyokeres u ka dërguar një paralajmërim të qartë kundërshtarëve të Suedisë, pasi skandinavët e nisën Kupën e Botës me një fitore të thellë 5-1 përballë Tunizisë.

Në këtë përballje, sulmuesi i Arsenalit ishte ndër figurat më të spikatura, teksa gjeti rrugën e rrjetës një herë dhe kontribuoi edhe me një asistim. Në të njëjtën kohë, lidhja e tij në sulm me Alexander Isak funksionoi në mënyrë të shkëlqyer në paraqitjen e tyre të parë në turneun më të madh futbollistik.

Para nisjes së Botërorit, bashkëpunimi mes Gyokeres dhe Isak ishte një nga çështjet që kishte marrë më shumë vëmendje, ndërsa në ndeshjen ndaj Tunizisë të dy e konfirmuan plotësisht pritshmërinë, duke dhënë së bashku dy gola dhe tri asistime.

Pas përfundimit të sfidës, 28-vjeçari u shfaq i kënaqur me atë që kishte prodhuar ekipi, duke lënë të nënkuptohej se kishte shumë pak arsye për kritika pas një paraqitjeje kaq bindëse.

“Nuk ka shumë për çfarë të ankohemi, apo jo?”.

“Alexander Isak? Gjithçka funksionon mirë si gjithmonë. Kemi pasur një partneritet të shkëlqyer edhe më parë”.

“Kur u godita, ende munda të shikoja nga toka dhe ishte bukur që ai shënoi”, shtoi sulmuesi suedez.

Gyokeres foli edhe për gjendjen e tij fizike, duke qetësuar tifozët, pasi gjatë ndeshjes u përball me disa ndërhyrje të forta nga lojtarët kundërshtarë.

“Ne e dimë se jemi një skuadër jashtëzakonisht e mirë. Ndoshta ndeshjet kualifikuese nuk e kanë treguar plotësisht këtë, por tani është bukur të tregojmë se çfarë mund të bëjmë. Kjo është kombëtarja e vërtetë”, deklaroi Gyokeres.

Me këtë sukses të thellë ndaj Tunizisë, Suedia është vendosur në një situatë shumë të mirë në Grupin F, përpara përballjeve më të forta që e presin ndaj Holandës dhe Japonisë./