FIFA hedh poshtë pretendimet për manipulim të ndeshjeve në Botëror me një reagim zyrtar

FIFA ka dalë me një qëndrim të prerë ndaj akuzave se gjatë Kupës së Botës 2026 mund të ketë pasur ndeshje të kurdisura.

Në edicionin e parë të Botërorit me 48 kombëtare u luajtën gjithsej 104 takime. Spanja e fitoi titullin botëror për herë të dytë në histori, pasi triumfoi ndaj Argjentinës në finalen e zhvilluar në stadiumin “MetLife”.

Megjithatë, turneu u shoqërua edhe me debate rreth arbitrimit. Pas humbjes 3-2 kundër Argjentinës, Federata Egjiptiane e Futbollit pretendoi se ishin bërë gabime të rënda dhe i kërkoi FIFA-s të përjashtonte gjyqtarët që drejtuan ndeshjen.

Federata egjiptiane kërkoi që, pas hetimit të gabimeve, arbitri kryesor dhe i gjithë ekipi i arbitrimit të largoheshin nga Botërori.

Polemika shkaktoi edhe përzgjedhësi i Egjiptit, Hossam Hassan. Përveç një gjesti kontrovers në vijën anësore, ai e akuzoi FIFA-n se po favorizonte Lionel Messin.

“Ata duan që Messi të qëndrojë në turne”, deklaroi Hassan pas përfundimit të ndeshjes.

Këto pretendime u kundërshtuan nga drejtuesi i gjyqtarëve në FIFA, Pierluigi Collina. Ai i përshkroi ato si “akuza të pabazuara” dhe doli në mbrojtje të integritetit të arbitrave.

Në reagimin e saj, FIFA njoftoi se Grupi i Punës për Integritetin nuk kishte zbuluar asnjë dëshmi për manipulim të ndeshjeve. Në këtë grup morën pjesë ekspertë të FIFA-s, FBI-së, INTERPOL-it, Zyrës së Kombeve të Bashkuara për Drogën dhe Krimin, Këshillit të Evropës, Shoqatës Ndërkombëtare për Integritetin në Bastore, si dhe institucioneve të tjera.

Sipas organizatës botërore të futbollit, tregjet e basteve dhe zhvillimet në fushë u mbikëqyrën në kohë reale gjatë gjithë turneut. Nga analizat nuk rezultoi asnjë model i pazakontë bastesh dhe asnjë sinjal që mund të lidhej me kurdisjen e ndonjë takimi.

“Bazuar në informacionin e mbledhur dhe analizuar gjatë gjithë garës, Grupi i Punës nuk identifikoi asnjë aktivitet të dyshimtë në bastore dhe asnjë tregues për manipulim të ndonjë ndeshjeje”, thuhej në deklaratën zyrtare të FIFA-s.

FIFA sqaroi gjithashtu se të gjitha raportet për bastet, së bashku me informacionet e siguruara gjatë turneut, u shqyrtuan dhe u ndanë ndërmjet institucioneve pjesëmarrëse në përputhje me procedurat operative.

Menaxheri i Lartë për Integritet në FIFA, Liam Rich, tha se ky bashkëpunim mundësoi krijimin e një strukture të fuqishme për shkëmbimin e të dhënave dhe shqyrtimin e çdo rreziku të mundshëm. Ai shtoi se ky model do të zbatohet edhe në turnetë e ardhshëm, përfshirë Kupën e Botës për Femra vitin e ardhshëm.