Fatjon Tafaj vlerëson Alen Vukajn: Më sjell ndër mend Musialën, Interi është mundësi e shkëlqyer për të

Trajneri i Kombëtares U-19, Fatjon Tafa, foli gjatë për Alen Vukajn në një intervistë për kanalin e FC Inter. Sulmuesi shqiptar po spikat si me ekipet e moshave të zikaltërve, ashtu edhe me kuqezinjtë, ndërsa paraqitjet e tij kanë tërhequr edhe vëmendjen e UEFA-s.

Tafaj e përshkroi Vukajn si një lojtar me cilësi dhe potencial, por theksoi se atij i duhet ende kohë për të arritur nivelin që synon. Ai gjeti ngjashmëri mes karakteristikave të Alenit dhe atyre të Jamal Musialës së Bayern Munich, si dhe shprehu besimin se, nëse vazhdon të përparojë, mund të krijojë mundësinë për të luajtur me ekipin e parë të Interit.

I pyetur për përshtypjen e parë nga Vukaj te ekipet e moshave të Shqipërisë, trajneri pranoi se ajo nuk përputhej plotësisht me pritshmëritë e tij. Sapo kishte marrë drejtimin e skuadrës dhe paraqitja e Alenit në stërvitjet e tyre të para nuk ishte në nivelin që priste.

Sipas tij, në atë kohë futbollisti po kthehej nga një dëmtim, gjë që mund t’i kishte ndikuar gjendjen fizike dhe ritmin në stërvitje. Në ndeshjen e parë i dha vetëm pak minuta, ndërsa në të dytën Vukaj pati ndikim dukshëm pozitiv. Kjo e ndihmoi trajnerin të shihte më qartë aftësitë dhe potencialin e tij. Që atëherë, paraqitjet e lojtarit kanë ardhur duke u përmirësuar dhe ai ka fituar vlerësimin e besimin e Tafajt.

Për rolin e Vukajt në skuadër, trajneri tha se ndikimi i tij pozitiv nuk buron vetëm nga aftësitë individuale. Aleni e kupton lojën, merr përgjegjësi, nuk tërhiqet në çastet e vështira dhe ndërmerr iniciativa për ta ndihmuar ekipin.

Në 7 ndeshje me Kombëtaren U-19 nën drejtimin e tij, Vukaj ka dhënë 4 asiste. Tafaj e cilësoi një nga futbollistët teknikisht më të fortë të ekipit, me inteligjencë në lojë dhe aftësi për të zgjidhur situata një kundër një e një kundër dy.

Kur iu kërkua ta krahasonte me një futbollist të njohur, trajneri tha se krahasime të tilla janë të vështira, veçanërisht për një lojtar kaq të ri. Megjithatë, për teknikën, inteligjencën taktike dhe mënyrën si vepron në duelet individuale, ai tha se Vukaj ka karakteristika të ngjashme me Jamal Musialën dhe se nuk ka dyshime për këtë.

Tafaj u shpreh gjithashtu i lumtur që Aleni luan me të rinjtë e Interit, në ekipin Primavera. Sipas tij, të qenët pjesë e një klubi me historinë dhe prestigjin e Interit është një mundësi shumë e mirë për zhvillimin teknik, taktik dhe profesional të futbollistit.

Sa i përket hapit të ardhshëm në karrierë, trajneri tha se përparësi duhet të ketë rritja e Alenit: të luajë rregullisht, të fitojë përvojë dhe të përballet me konkurrencë më të fortë. Qëndrimi te Interi për të luajtur me ekipin e dytë në Serie C do të ishte një alternativë e mirë, pasi do ta mbante nën vëmendjen e ekipit të parë. Ai nuk përjashtoi as kalimin në një kampionat më konkurrues, nëse atje Vukaj do të kishte hapësirë dhe rol të rëndësishëm.

Për Tafajn, më shumë rëndësi se vendi ku do të luajë ka zgjedhja e hapit të duhur në kohën e duhur. Ai tha se Vukaj duhet të vijojë punën dhe ta ndërtojë karrierën me durim e vendime të matura.

I pyetur nëse Aleni mund të bëhet një ditë titullar i ekipit të parë të Interit, trajneri theksoi se talenti dhe potenciali nuk mjaftojnë të vetëm. Puna e fortë, sakrificat dhe vazhdimësia në zhvillim, të ndërthurura me cilësitë që ka, mund t’ia hapin rrugën drejt ekipit të parë.

Për pretendimin se Maran po e vëzhgon Vukajn, Tafaj tha se bashkëpunon shkëlqyeshëm me të dhe me stafin e tij dhe se komunikimi mes tyre është i vazhdueshëm. Stafi i Maranit, sipas trajnerit, merr informacion të hollësishëm jo vetëm për Alenin, por për të gjithë lojtarët e ekipit me potencial, të cilët konsiderohen pjesë e rëndësishme e së ardhmes së futbollit shqiptar. Përparimi i tyre do të varet nga puna, rritja dhe vazhdimësia që do të tregojnë.

Në fund, Tafaj përsëriti se Vukaj i ka cilësitë dhe talentin për të ndërtuar një karrierë të suksesshme. Për të arritur aty, megjithatë, do t’i duhen shumë punë dhe përkushtim; vendimtare do të jetë mënyra se si ai vetë e shfrytëzon potencialin e tij.