Emmanuel Petit habit me qëndrimin ndaj Sakas: Anglia ka futbollistë më të mirë se ai

Emmanuel Petit, ish-mesfushori i Arsenalit, ka shprehur kritika të forta ndaj Bukayo Sakas, duke thënë se sipas tij anësori nuk e meriton një vend titullari te Anglia në Kupën e Botës.

Ndonëse Arsenali arriti të fitojë titullin e Ligës Premier, francezi vlerëson se forma e Sakas ka pësuar rënie të dukshme, pasi gjatë këtij sezoni ai shënoi vetëm 11 gola në 49 ndeshje.

Sipas Petit, përfaqësuesja angleze ka opsione dukshëm më të mira në prag të nisjes së turneut.

Në një prononcim për talkSPORT, ish-reprezentuesi francez u tregua mjaft i ashpër në analizën e paraqitjeve të fundit të yllit të Arsenalit.

Edhe pse Saka dha kontribut në suksesin e “Topçinjve” në Ligën Premier dhe në rrugëtimin deri në finalen e Ligës së Kampionëve, Petit beson se pesha e tij në lojë ka rënë ndjeshëm.

“Saka, për mua, nuk vjen pas një sezoni të mirë me Arsenalin. Këtë e pamë edhe në finalen e Ligës së Kampionëve”, deklaroi Petit.

“Ai nuk po bën më diferencën dhe mendoj se ka lojtarë të tjerë që e meritojnë më shumë të jenë në formacionin titullar”.

Pavarësisht sezonit shumë të mirë të Arsenalit, legjenda franceze nuk është e bindur që 24-vjeçari duhet të konsiderohet zgjedhje e padiskutueshme te Anglia.

“Jam një admirues i madh i Sakas, por duhet të jem i sinqertë. Nëse do të isha bashkëlojtar i tij, nuk do ta kuptoja këtë situatë. Ka shumë lojtarë të fortë dhe të talentuar që aktualisht janë më të mirë se Saka”.

Finalja evropiane ishte një tjetër ndeshje e vështirë për sulmuesin anglez, i cili sezonin e mbylli me 11 gola në 49 paraqitje në të gjitha garat.

Prej tyre, shtatë gola i realizoi në 31 ndeshje në Ligën Premier, statistika që Petit i sheh si të pamjaftueshme për t’i siguruar një vend titullari me Anglinë në Kupën e Botës.