Desailly kritikon vendimin e Real Madridit: Vinicius duhej të ishte shitur gjatë verës

Mbajtja e Vinicius Juniorit në skuadër gjatë merkatos së verës ishte një vendim i gabuar i Real Madridit, sipas Marcel Desailly. Legjenda franceze, fitues i Kupës së Botës 1998, vlerëson se përpjekja për ta vendosur brazilianin përkrah Kylian Mbappes në formacionin titullar ka krijuar vështirësi taktike dhe ka cenuar ekuilibrin e ekipit.

Në një prononcim për beIN Sports, ish-futbollisti i përfaqësueses së Francës shprehu dyshime për zgjedhjen e klubit madrilen që të vazhdonte me të dy sulmuesit. Sipas tij, largimi i brazilianit do t’i kishte dhënë skuadrës mundësinë të gjente një ekuilibër më të mirë.

Këtë verë, Real Madridi hapi një etapë të re me rikthimin e Jose Mourinhos në drejtimin e ekipit. Ndërkohë, pas bisedimeve të gjata për rinovimin dhe një historie të zgjatur transferimi, në të cilën u përfshi edhe Arsenali, Vinicius zgjodhi të firmoste një marrëveshje afatgjatë.

Megjithëse e ardhmja e tij në “Santiago Bernabeu” tashmë ishte përcaktuar, forma e anësorit brazilian pësoi një rënie të dukshme. Pas firmosjes së kontratës së re, ai e ka pasur të vështirë të shfaqë versionin e tij më të mirë.

Një nga shkaqet kryesore të këtyre vështirësive është bashkëveprimi jo bindës në fushë me Kylian Mbappenë, yllin tjetër të repartit ofensiv. Kjo situatë ka rritur edhe presionin mbi brazilianin.

Në vlerësimin e Desailly, drejtuesit madrilenë duhej t’i kishin hapur rrugën largimit të Viniciusit dhe të kërkonin futbollistë të tjerë. Ai argumentoi se partneriteti mes Mbappes dhe brazilianit, i cili vazhdon të jetë temë diskutimi, nuk ka dhënë suksesin e pritur.

Duke e paraqitur këtë si gjykimin e tij personal në rolin e analistit, francezi shtoi se një largim do të kishte qenë zgjidhja më e mirë për Viniciusin. Sipas tij, kështu do të mund të shihej nëse sulmuesi do të arrinte të linte pas mendimet dhe opinionet negative të krijuara ndaj tij.