Del Piero vlerëson Real Madridin dhe tregon çfarë i kushtoi Romës

Alessandro Del Piero, legjenda e Juventusit, lavdëroi futbollistët e Real Madridit për reagimin e tyre në fitoren dramatike ndaj Romës në Ligën e Kampionëve.

Roma kryesonte 3-1 në Olimpico të mërkurën në mbrëmje, por Reali përmbysi rezultatin dhe triumfoi 4-3. Kështu, madrilenët shmangën humbjen e parë të këtij sezoni në Ligën e Kampionëve, në raundin e dytë të fazës së ligës.

“Prisnim që Roma ta kontrollonte lojën dhe kjo ndodhi. Megjithatë, këtyre lojtarëve të jashtëzakonshëm të Real Madridit u mjaftojnë vetëm 15 minuta për të krijuar tre apo katër mundësi të pastra shënimi. Ata kanë cilësi të jashtëzakonshme dhe përvojën për ta kuptuar se asgjë nuk është vendosur përfundimisht”, deklaroi Del Piero për gazetën AS.

Sipas tij, Liga e Kampionëve është kthyer në një garë ku çdo rezultat mbetet i mundur. Edhe një epërsi e konsiderueshme mund të mos mjaftojë: një skuadër mund të ndihet e sigurt kur udhëheq me dy gola në shtëpi, dhjetë minuta para fundit, pasi ka zhvilluar lojë më të mirë.

Del Piero mendon se Roma nuk ka arsye të bëjë ndryshime rrënjësore pas kësaj humbjeje. Një rishikim i plotë, sipas tij, do të justifikohej pas një disfate 4-0 ose pas tri humbjeve radhazi, por jo pas një ndeshjeje të tillë.

Ai tha se Roma u mposht për shkak të humbjes së përqendrimit dhe se tani duhet të lërë pas zhgënjimin. “Një humbje e këtij lloji mund ta ndihmojë një ekip të rritet”, u shpreh legjenda e Juventusit.

Del Piero përfundoi duke thënë se Giallorossët kanë potencialin të shndërrohen në një skuadër të nivelit të parë, nëse bëjnë disa ndryshime.