Chelsea ia ndalon pjesëmarrjen në Lojërat Olimpike dy yjeve të ekipit

Chelsea raportohet se ia ka ndaluar dy yjeve të ekipit që të ftohen nga përzgjedhësi Thierry Henry tek Franca për Lojërat Olimpike.

Henry i cili do të udhëheq ekipin e Francës në futboll për Lojërat Olimpike, ka publikuar listën preliminare prej 24 futbollistëve të ftuar, e cila do të reduktohet në 18 lojtarë për ndeshjet e Parisit.

Skuadra e tij përbëhet prej dy lojtarëve mbi moshën 23-vjeçare, me sulmuesin e Crystal Palace, Jean-Philippe Mateta dhe ish-sulmuesi i Arsenalit, Alexandre Lacazette, për të mbushur vendet e lojtarëve të vjetër.

Bashkëlojtari i Matetas, Michael Olise, ka qenë i përzgjedhur gjithashtu nga Henry, por megjithatë ai do të mbetet pa shërbimet e disa lojtarëve të rëndësishëm.

Kjo për shkak se Chelsea ia ka ndaluar Henryt që t’i ftojë Benoit Badiashile dhe Malo Guston në ekipin e tij të Francës për Lojërat Olimpike.

Që të dy, Badiashile dhe Gusto nuk ia dolën që të bëhen pjesë e ekipit të Didier Deschamps për Euro 2024.

Enzo Maresca i cili pritet të emërohet si trajner i Chelseat para sezonit 2024/2025, dëshiron kohë që të implementojë stilin e tij të lojës gjatë stërvitjeve në Cobham, sipas një raportimi të ri.

“Blutë e Londrës” megjithatë e kanë lejuar të riun Lesley Ugochukwu që të paraqitet për Francën në Lojërat Olimpike, duke shtuar se atij i nevojiten minuta para startit të sezonit të ri. /Telegrafi/