Botërori 2026 thyen ritmin e golave pas 68 vitesh, mes dyshimeve për topin dhe ndikimit të ndërprerjeve

Botërori 2026 po ofron spektakël të madh dhe ka prekur kuotën e 100 golave më shpejt se çdo edicion tjetër i Kupës së Botës në 68 vitet e fundit.

Golin e 100-të të turneut e realizoi sulmuesi i Holandës, Cody Gakpo, në suksesin e thellë 5-1 ndaj Suedisë, duke bërë që shifra me tre numra të arrihej pas vetëm 33 ndeshjesh të luajtura.

Edicioni i vetëm që e ka kaluar këtë ritëm mbetet ai i vitit 1954 në Zvicër, ku 100 golat u regjistruan pas vetëm 20 takimesh. Ndërkohë, në Botërorin e Brazilit 2014 dhe në atë të Spanjës 1982 u nevojitën 36 ndeshje për të mbërritur në të njëjtin total.

Turneu që po zhvillohet në SHBA, Meksikë dhe Kanada ka aktualisht një mesatare prej 3.09 golash për ndeshje dhe po shihet si një kampionat që mund të kalojë shifrën e 300 golave.

Yjet po bëjnë diferencën që në fazën e parë

Një nga shpjegimet për numrin e lartë të golave lidhet me formën shumë të mirë të futbollistëve kryesorë.

Lionel Messi ka shënuar het-trik, Kylian Mbappe ka realizuar dy gola ndaj Senegalit, Vinicius Junior ka tundur rrjetën në të dy sfidat e Brazilit, ndërsa Erling Haaland dhe Harry Kane e kanë nisur gjithashtu turneun me dopieta.

Sipas analistëve, në ndryshim nga kampionatet e mëparshme kur shumë lojtarë mbërrinin të konsumuar pas një sezoni të gjatë me klubet, këtë herë emrat më të mëdhenj po paraqiten në gjendje optimale.

A po ua vështirëson punën portierëve topi i ri?

Një prej faktorëve që po diskutohet gjithnjë e më shpesh është topi zyrtar i Adidasit, “Trionda”.

Në disa raste, portierët janë shfaqur të pasigurt ndaj trajektores së tij, ndërsa golat spektakolarë nga distanca kanë shtuar dyshimet se ai sillet ndryshe nga sa pritej.

Një nga episodet më të përfolura ishte goli i Kylian Mbappes nga rreth 30 metra kundër Senegalit. Deri tani janë realizuar më shumë se dhjetë gola nga jashtë zonës, ndërsa disa gardianë kanë gabuar pas goditjeve që kanë marrë devijime të papritura.

Ish-portieri i Anglisë, Joe Hart, është shprehur se topi duket se po ua komplikon detyrën portierëve, ndërsa Paul Robinson ka thënë se në disa raste ai nuk ka reaguar sipas pritshmërive.

Një rast i ngjashëm ishte parë edhe në Botërorin 2010 me topin famëkeq “Jabulani”, i cili u kritikua për lëvizjet e tij të paparashikueshme.

Formati me 48 skuadra po ndikon në shtimin e golave?

Rritja e Kupës së Botës nga 32 në 48 skuadra ishte shoqëruar me shqetësimin se do të prodhonte shumë ndeshje të pabarabarta.

Nxehtësia dhe ndërprerjet për hidratim a po luajnë rol?

Temperaturat e larta në Amerikën e Veriut mund të jenë një tjetër element me peshë në këtë zhvillim.

Nga 105 golat e parë të turneut, 30 janë shënuar pas minutës së 76-të, që përbën pothuajse 29 për qind të totalit.

Lodhja fizike ka prodhuar edhe një numër të madh gabimesh individuale, të cilat janë ndëshkuar nga kundërshtarët.

Në të njëjtën kohë, pushimet e detyrueshme treminutëshe për hidratim po shfrytëzohen nga trajnerët jo vetëm për të freskuar futbollistët, por edhe për të dhënë udhëzime taktike dhe për të bërë rregullime strategjike gjatë ndeshjeve.

Në përfundim, ky Botëror po dhuron shumë gola, ritëm të lartë dhe një rekord që nuk ishte regjistruar prej afro shtatë dekadash.