Betim Fazliji nuk transferohet te Zurichu, Ancillo Canepa zbulon arsyen

Kalimi i Betim Fazlijit te Zurichu është anuluar në fund të afatit kalimtar, pasi mbrojtësi i St. Gallenit nuk i ka kaluar me sukses ekzaminimet mjekësore.

Lajmin e ka konfirmuar të martën presidenti i Zurichut, Ancillo Canepa, në një prononcim për “Blue Sport”.

Edhe pse bisedimet mes dy klubeve kishin përparuar ndjeshëm dhe marrëveshja konsiderohej thuajse e mbyllur, Zurichu vendosi të mos e finalizojë transferimin e 27-vjeçarit.

“Bisedimet kishin avancuar dhe në thelb e kishim arritur marrëveshjen. Çështja lidhej me kontrollin mjekësor. Nuk bëhet fjalë për një problem të madh, por atij do t’i nevojiten disa javë për t’u rikthyer në gjendje të plotë”, ka thënë Canepa.

“Në rrethanat ku ndodhemi, kemi nevojë për një lojtar që mund ta përdorim menjëherë. Ai do të ishte një përforcim ideal në rolin e liderit. Për fat të keq, nuk jemi në gjendje ta përfundojmë transferimin”, ka shtuar presidenti i Zurichut.

Fazliji, i cili ka zhvilluar 23 ndeshje me Kosovën, do të mbetet te St. Galleni. Kontrata e tij me klubin zviceran është e vlefshme deri në vitin 2027.