Besnik Krasniqi u premton tifozëve mbrojtjen e titullit dhe paralajmëron kundërshtarët

Kapiteni i Dritës, Besnik Krasniqi, ka deklaruar se objektivi kryesor i skuadrës mbetet fitimi i titullit kampion, pavarësisht nisjes jo të mirë të sezonit. Në një intervistë për Telegrafin, ai theksoi se ekipi është i vendosur ta ruajë kurorën e kampionit të Kosovës.

Sipas tij, fillimi i zbehtë i kampionatit u ndikua nga angazhimi i skuadrës në kualifikimet për Ligën e Konferencës, por tani situata ka ndryshuar dhe kjo u dëshmua me fitoren ndaj Ballkanit.

Mbrojtësi i djathtë, i cili prej vitesh luan rol kyç te Drita, u zotua para tifozëve se ekipi do të punojë me intensitet maksimal për të mbajtur epitetin e kampionit.

“Nuk e kemi nisur si duhet, por kjo nuk duhet të na dekurajojë. Duhet të vazhdojmë me paraqitje cilësore dhe të sigurojmë fitore”, u shpreh Krasniqi.

Ai shtoi se Drita gjithmonë garon për titullin dhe se të gjithë lojtarët janë të ndërgjegjshëm për përgjegjësinë që kanë për ta mbrojtur atë. “Do të punojmë shumë për ta arritur këtë objektiv”, premtoi kapiteni.

Krasniqi ishte protagonist në fitoren e ngushtë kundër Ballkanit, duke shënuar në minutat shtesë për t’i dhënë tri pikë të arta skuadrës gjilanase.

Megjithatë, si kapiten i vërtetë, ai tha se gëzimi për rezultatin ekipor e tejkalon kënaqësinë personale për golin e shënuar, ndërsa shprehu besim të plotë se skuadra do ta përmbushë objektivin deri në fund të sezonit.

“Jam më i lumtur për pikët sesa për golin tim. Zhvilluam një ndeshje shumë të mirë, krijuam shumë mundësi dhe besuam deri në fund se do t’i merrnim tri pikët”, deklaroi ai.

Duke folur për rivalët kryesorë në garën për titull, Krasniqi veçoi Prishtinën, Dukagjinin dhe Malishevën, skuadra që kanë nisur sezonin në mënyrë të shkëlqyer dhe ndodhen në krye të renditjes.

“Në këto tetë xhiro kanë bërë shumë mirë Prishtina, Dukagjini dhe Malisheva… por deri në fund do të jetë një betejë e fortë për titullin mes të gjitha këtyre skuadrave”, theksoi ai.

Një statistikë befasuese për Dritën këtë sezon është se ka arritur vetëm një fitore në ndeshjet si vendase. Megjithatë, 36-vjeçari theksoi se skuadra nuk do të lejojë më humbje pikësh në shtëpi, duke e cilësuar këtë si armën e tyre më të fortë historikisht.

“Këto nuk duhet të na ndodhin sepse ndeshjet si vendas kanë qenë gjithmonë arma jonë më e fuqishme. I kemi fituar gjithnjë dhe nuk duhet të lejojmë më të humbim pikë”, përfundoi Krasniqi.

Aktualisht, Drita ka grumbulluar 14 pikë në elitën e futbollit kosovar, pesë më pak se kryesueset Malisheva dhe Prishtina. Në fundjavë, skuadra gjilanase do të përballet me Llapin.