Balde mund të largohet nga Barcelona në janar, në radar të klubeve të Premier League

Alejandro Balde po mendon të largohet nga Barcelona gjatë afatit kalimtar të janarit, pasi roli i tij në planet e trajnerit Hansi Flick është zvogëluar.

Mbrojtësi i majtë spanjoll ka zgjuar interesimin e Sunderlandit, që po shqyrton mundësinë për ta marrë në huazim për gjysmën e dytë të sezonit. Klubi anglez synon që 22-vjeçari të ketë më shumë minuta dhe të luajë rregullisht në Ligën Premier.

Sipas TEAMtalk, Barcelona i ka dhënë lojtarit leje të shqyrtojë një largim të përkohshëm në mes të sezonit, për shkak të rënies së rolit të tij nën drejtimin e Flick.

Balde u bë pjesë e ekipit të parë të klubit katalanas në korrik të vitit 2022 dhe ka kontratë deri në qershor të vitit 2028. Megjithëse vlera e tij në treg vlerësohet rreth 50 milionë euro dhe ai numëron shtatë paraqitje për kombëtaren e Spanjës, ka humbur terren në garën për krahun e majtë.

Sunderland nuk është klubi i vetëm që e ndjek. Përfaqësuesit e Baldes kanë kontaktuar edhe me Evertonin dhe Fulhamin, ndërsa oferta për huazimin e tij u është paraqitur gjithashtu Manchester Unitedit dhe Liverpoolit.

Sunderland po shqyrton nëse mund ta përballojë pagën e futbollistit në një marrëveshje huazimi në janar, pa tejkaluar kufizimet financiare të klubit. Balde, nga ana e tij, raportohet se është i gatshëm të luajë në futbollin anglez gjatë pjesës së dytë të sezonit 2026/27.

Ende nuk është vendosur nëse marrëveshja e huazimit do të përmbajë një opsion jo të detyrueshëm për blerjen e tij në fund të sezonit. Drejtuesit e Sunderlandit mendojnë se Balde do t’i jepte më shumë dinamizëm krahut të majtë dhe do të ishte një përforcim me rëndësi.

Përfaqësuesit e mbrojtësit pritet të zhvillojnë bisedime më konkrete me drejtuesit e Sunderlandit gjatë pushimit të nëntorit për ndeshjet e kombëtareve. Nëse palët bien dakord që klubi anglez të mbulojë pagën e tij, Barcelona është e gatshme ta zyrtarizojë huazimin para hapjes së afatit kalimtar dimëror.