Alejandro Balde vendos të largohet nga Barcelona, Manchester United në garë për mbrojtësin

Sipas të përditshmes MARCA, Alejandro Balde ka vendosur përfundimisht të ndahet nga Barcelona përpara përfundimit të afatit kalimtar të verës.

Mbrojtësi 22-vjeçar i krahut të majtë kishte planifikuar fillimisht të vazhdonte në “Camp Nou”, por transferimi i Joao Cancelos dhe mosaktivizimi i tij në përballjen me Elchen, ku trajneri zgjodhi talentin e ri Xavi Espart, e kanë shtyrë të marrë këtë vendim.

Ndërkohë, agjenti Jorge Mendes dhe drejtori sportiv i Barcelonës, Deco, kanë nisur punën për të gjetur një skuadër të re për futbollistin.

Manchester United vazhdon të shihet si opsioni kryesor për Balden, megjithëse në orët e fundit skenari i transferimit ka ndryshuar.

Pasi ka shpenzuar shumë në ditët e fundit të merkatos dhe përballet me kufizime financiare, klubi anglez nuk po mendon më për blerjen e kartonit të tij, por për një huazim.

Barcelona do të preferonte një shitje të përhershme të mbrojtësit, por koha e shkurtër që ka mbetur deri në mbylljen e afatit mund t’i detyrojë katalanasit të pranojnë largimin e tij në formë huazimi.

Për rrjedhojë, Balde po afrohet gjithnjë e më shumë me një të ardhme jashtë Barcelonës, ndërsa Manchester United mund të jetë klubi ku ai do të vijojë karrierën.