Autoritetet amerikane ia ndalojnë hyrjen një lojtari përpara Kupës së Botës për Klube

Kupa e Botës për Klube e këtij viti është konsideruar si një turne unik, me 32 skuadra nga e gjithë bota që synojnë lavdinë futbollistike dhe një shumë të majme parash. Vetëm Real Madrid, në rast fitoreje, pritet të arkëtojë deri në 150 milionë euro nga pjesëmarrja dhe shpërblimet.

Megjithatë, përveç emocionit sportiv, turneu po zhvillohet në një klimë jashtëzakonisht të ndërlikuar, si në kuptimin e kushteve të motit, ashtu edhe të situatës politike në Shtetet e Bashkuara.

Në Los Anxhelos, Presidenti amerikan Donald Trump ka dërguar Gardën Kombëtare për të menaxhuar protestat kundër dëbimeve të emigrantëve, ndërsa agjentë të ICE (Shërbimi i Emigracionit dhe Doganave) janë vendosur pranë stadiumeve, duke ngritur shqetësime për sigurinë dhe lirinë e lëvizjes së tifozëve.

Nga ana tjetër, FIFA është detyruar të ulë ndjeshëm çmimet e biletave, pasi shitjet kanë qenë nën pritshmëri, vetëm rreth një e treta e biletave janë shitur për disa ndeshje, përfshirë edhe atë hapëse.

Ndërkohë, sfidat nuk ndalen vetëm te logjistika. Sipas raportimeve nga Marca, mbrojtësi i Boca Juniors, Ayrton Costa, është refuzuar për herë të dytë nga autoritetet amerikane për të hyrë në vend.

Ai pritej të debutonte në këtë turne të hënën kundër Benficës, por ndalimi ka vënë në pikëpyetje pjesëmarrjen e tij.

Refuzimi ka ardhur si pasojë e një akuze të kaluar për lidhje me persona të përfshirë në krim, përfshirë një grabitje dhe një rast femicidi nga vëllai i tij.

Megjithatë, Costa nuk është paditur apo dënuar asnjëherë për ndonjë vepër penale.

Boca Juniors po shpreson që situata të zgjidhet përmes Ambasadës Amerikane në Buenos Aires, ose që FIFA të ndërhyjë për të përshpejtuar procesin e vizës.