Arsenali hap bisedimet me Atleticon për Julian Alvarezin

Arsenali ka nisur kontaktet zyrtare me Atletico Madridin për të shqyrtuar mundësinë e transferimit të Julian Alvarez, ndërsa klubi londinez po analizon nëse mund të gjendet një zgjidhje konkrete për sulmuesin argjentinas.

Sipas raportimeve, drejtues të Arsenalit janë takuar në Londër me drejtorin sportiv të Atletico Madridit, Mateu Alemany. Në qendër të diskutimeve ka qenë e ardhmja e 26-vjeçarit.

Gjithsesi, arritja e një marrëveshjeje duket e vështirë. Arsenali e konsideron tepër të lartë vlerësimin financiar që klubi madrilen i ka vendosur lojtarit, çka e lë ende larg një akord të mundshëm.

Edhe qëndrimi i vetë Alvarezit paraqet një pengesë për operacionin. Deri në këtë fazë, argjentinasi nuk ka shprehur dëshirë për rikthim në Angli, pasi Barcelona ka qenë alternativa e tij e preferuar.

Pavarësisht kësaj, Arsenali ka zgjedhur të vijojë komunikimin me Atleticon, me synimin për të kuptuar nëse mund të krijohen kushtet për një marrëveshje për sulmuesin e kombëtares argjentinase.

Londinezët po shqyrtojnë formulat e mundshme që mund ta nxisnin Atleticon të ulej në negociata, duke tentuar njëkohësisht të bindin Alvarezin për një kalim në Ligën Premier.