Anglia nis me fitore Botërorin 2026 dhe thyen një rekord historik në ndeshjet e para

Anglia e ka hapur në mënyrën më të mirë rrugëtimin e saj në Kupën e Botës 2026, pasi mposhti Kroacinë me rezultatin 4-2 në sfidën e parë të fazës së grupeve.

Ekipi i drejtuar nga Thomas Tuchel u shfaq i rrezikshëm në sulm dhe mjaft efikas ndaj kroatëve, duke marrë tre pikë me shumë peshë që në nisje të kompeticionit.

Përtej triumfit në fushë, kjo fitore ka sjellë edhe një arritje historike për “Tre Luanët”. Për herë të parë, Anglia ka fituar tri ndeshje hapëse radhazi në historinë e saj në Kupën e Botës.

Kjo ecuri pozitive kishte filluar në Botërorin e vitit 2018, kur anglezët fituan 2-1 ndaj Tunizisë. Më pas ajo vijoi në Katar 2022 me suksesin e thellë 6-2 kundër Iranit, ndërsa tani është zgjatur edhe në Botërorin 2026 pas fitores 4-2 ndaj Kroacisë.

Herën e fundit që Anglia e nisi një Kupë Bote me disfatë ishte në vitin 2014, kur u mund 2-1 nga Italia në ndeshjen e parë të grupit.

Ky rekord i ri është një tregues i qartë i qëndrueshmërisë dhe vazhdimësisë që Anglia ka ndërtuar në turnetë e mëdhenj, teksa skuadra shihet si një nga pretendentet serioze për të avancuar larg në këtë edicion të Kupës së Botës.

Ndeshjen e radhës Anglia do ta luajë më 23 qershor ndaj Ganës, në një përballje që mund ta afrojë edhe më shumë me sigurimin e kualifikimit për në fazën me eliminim direkt.