Alejandro Balde kërkon largimin në janar, vë në vështirësi Hansi Flickun

Alejandro Balde është i gatshëm të largohet nga Barcelona në afatin kalimtar të janarit. Mbrojtësi spanjoll ka nisur të besojë se pozita e tij në klub vështirë se do të ndryshojë.

“Mundo Deportivo” raporton se Balde po bëhet gjithnjë e më i pakënaqur me rolin e tij. Që prej fillimit të sezonit, ai ka qenë kryesisht jashtë planeve të trajnerit Hansi Flick.

23-vjeçari priste një rikthim në formacionin bazë pas lëndimeve në mbrojtje, por qasja e trajnerit gjerman ndaj tij ka ndryshuar pak. Mosaktivizimi i tij nga minuta e parë kundër Alavesit e përforcoi këtë përshtypje.

Në hierarkinë e mbrojtësve të majtë, Joao Cancelo dhe Xavi Espart janë aktualisht përpara Baldes. Për këtë arsye, besimi i tij se mund të marrë një rol më të rëndësishëm po zbehet.

Balde është i zhgënjyer edhe me mënyrën se si Flick po e trajton situatën e tij. Sipas raportimeve, trajneri nuk ka komunikuar mjaftueshëm drejtpërdrejt me futbollistin spanjoll. Së fundmi, Flick kritikoi paraqitjet e tij, duke thënë se Baldes i mungon vetëbesimi i nevojshëm për të luajtur në nivelin më të lartë.

Barcelona, ndërkaq, po përpiqet ta shesë në janar, siç kishte tentuar edhe gjatë verës, për të siguruar të ardhura që do t’i shërbenin përforcimit të mbrojtjes.

Liga Premier konsiderohet destinacioni më i mundshëm për Balden, ndërsa Manchester Unitedi vazhdon ta ndjekë nga afër situatën e tij.