Tom Doshi flet për rezultatin e 14 majit: Nuk është surprizë, partia është rritur gradualisht

Partia Social Demokrate  arriti të korrte fitore masive në zgjedhjet e 14 Majit, duke marrë rreth 85 mijë vota dhe gati 120 mandate këshillash bashkiak.

Edhe pse u konsiderua surpriza e këtyre zgjedhjeve, për kryetarin e PSD-së, Tom Doshi, rezultati ishte i pritshëm, madje edhe i kënaqshëm.

I ftuar në “Top Story” ai tha se rezultatet e zgjedhjeve erdhën në sajë të një pune graduale që  ka rritur partinë ndër vite.

Doshi: Rezultati nuk është surprizë, partia është rritur gradualisht. Kur kam kandiduar për herë të parë me Partinë Social Demokrate në qarkun e Shkodrës në 2017-ën kam qenë deputeti më i votuar me 13400 vota, duke i pasur të gjitha partitë kundër.

Ne në atë kohë nuk kishim as komisionerë. Vetëm vëzhgues.

Në 2019-ën, morrëm pjesë në zgjedhjet që PD-ja nuk mori pjesë, por vendosi t’i braktiste zgjedhjet lokale. Mandatet që ne morëm s’kishin ndonjë vlerë, pasi ishte mazhoranca ajo që i kishte të gjitha bashkitë, PS-ja.

Në 2021-shin unë u bëra kryetar partie dhe më lanë pa fushatë. Unë jam përqendruar në dy qarqe, Shkodër dhe në Tiranë.

Në Shkodër mora 2 mandate, në Tiranë 1. Gjatë kësaj kohe kemi punuar me njerëzit, kemi pasur kontakte dhe në këto zgjedhje kemi marrë një rezultat që duhet me thënë, i kënaqshëm, jo surprizë./Albeu.com/