Deputeti i Partisë Demokratike në Durrës, Ferdinand Xhaferraj, ka denoncuar se prej tre ditësh në spitalin e Durrësit nuk funksionon laboratori i analizave.
Kjo sipas tij, ka ardhur për mungesë fondesh.
Përmes një postimi të bërë në rrjetet sociale, deputeti thotë se pacientëve tashmë u janë rritur në mënyrë të ndjeshme kostot, për shkak se përveç medikamenteve u duhet të bëjnë edhe analizat bazë në privat.
Postimi i Xhaferrajt:
“Ferdinand, ka marrë fund gjithcka.” Këto ishin fjalët e një prej anëtarëve të stafit të përkushtuar të Spitalit Rajonal të Durrësit. Prej tre ditësh në spitalin e Durrësit nuk funksionon laboratori i analizave për mungesë fondesh. Si mund të kurohen pacientët pa pasur analizat si bazë? Pacientët, të cilët përvec ilaceve tani janë të detyruar të kryejnë edhe analizat më bazike privatisht, do të rimbursohen për këtë mosfunksionim? Qeveria e fokusuar tek koncertet madhështore, ka lënë spitalet në gjendje të mjeruar. Skizma ndërmjet prioriteteve të Rilindjes dhe nevojave të qytetarëve sa vjen e thellohet, me kosto në rritje vetëm për këto të fundit.
