Ricky Martin rikthehet në ekranin e madh me filmin e ri të Gael García Bernal

Pas një shkëputjeje prej më shumë se dy dekadash, Ricky Martin do të rikthehet në kinematografi me një rol në filmin e ri të Gael García Bernal, “Hombre al Agua”. Përveç interpretimit, këngëtari portorikan është angazhuar edhe si producent ekzekutiv i projektit.

Produksioni pritet të prezantohet për herë të parë në botë dhe në Amerikën e Veriut gjatë Festivaleve të Filmit në Venecia dhe Toronto, të cilat zhvillohen muajin e ardhshëm. Sipas “Deadline”, Martin iu bashkua kastit pak para fillimit të xhirimeve në Meksikë.

“Hombre al Agua” cilësohet si një komedi dramatike me nuanca sureale dhe shënon filmin e tretë artistik të drejtuar nga Gael García Bernal. Bernal ka gjithashtu rolin kryesor, ka marrë pjesë në shkrimin e skenarit dhe është përfshirë në prodhimin e filmit.

Ngjarja përqendrohet te Camilo, një roje plazhi kubaneze, i cili shpëton në Karaibe nga mbytja Abelin, një biznesmen të fuqishëm meksikan që synon të hyjë në politikë. Pas kësaj, Camilo e ndjek Abelin drejt Meksikës, bëhet ndihmësi i tij më i afërt dhe martohet me vajzën e biznesmenit. Por realiteti i jetës së re që nis për të është shumë më i rrezikshëm nga sa e kishte menduar.

Ricky Martin interpreton Robyn, një aktor që angazhohet për të luajtur personazhin e Camilos në një film biografik të prodhuar nga bashkëshortja e tij.

Gael García Bernal ka rrëfyer se Martin ishte kandidati i parë që kishte menduar për këtë rol, megjithëse, për shkak të vështirësive për ta kontaktuar, nuk ia përmendi emrin askujt gjatë pjesës më të madhe të përgatitjeve.

“Ricky ishte i pari që mendova për rolin, por më dukej si një ide aq e çmendur, pothuajse e pamundur”, tha Bernal.

Regjisori dhe aktori meksikan shpjegoi se personazhi kërkonte vetëm një ditë xhirimesh. Pak përpara nisjes së produksionit, ai arriti të siguronte numrin e telefonit të Martin dhe e telefonoi. “Përpara se t’i shpjegoja projektin, ai tha: ‘Çfarëdo që të duash’”, tregoi Bernal.

Në kastin e filmit janë gjithashtu Esmeralda Pimentel, Débora Nascimento, Natalia Oreiro, Anna Díaz, Manuel García Rulfo dhe Jorge Salinas.

“Hombre al Agua” është realizuar si bashkëprodhim nga Gael García Bernal dhe Diego Luna përmes kompanisë së tyre La Corriente del Golfo. Për skenarin, Bernal ka bashkëpunuar me Mariano Pensotti.

Shfaqja e filmit në kinematë e Meksikës është planifikuar për 24 shtator. “Hombre al Agua” është një nga 17 produksionet që garojnë për të përfaqësuar Meksikën në Çmimet e 99-ta të Akademisë.