iOS 27 mbërrin sot: Ja kur pritet të jetë i disponueshëm dhe cilët iPhone e mbështesin

Apple pritet të nxjerrë sot, më 14 shtator, versionin e ri të sistemit operativ iOS 27. Përditësimi konsiderohet ndër më të rëndësishmit e viteve të fundit dhe sjell ndryshime në inteligjencën artificiale, kamerë, dizajn dhe performancë.

Ndër risitë kryesore përfshihet një Siri më e avancuar, e aftë të kuptojë më mirë kontekstin dhe të përmbushë kërkesa më të ndërlikuara. Përditësimi sjell gjithashtu funksione të reja me inteligjencë artificiale, përmirësime në aplikacionin e kamerës, më shumë mundësi personalizimi për dizajnin “Liquid Glass” dhe optimizime të ndjeshme të shpejtësisë.

Asistenti i Apple pritet t’u mundësojë përdoruesve kërkimin e fotografive përmes përshkrimeve të përgjithshme, regjistrimin automatik të datave në kalendar dhe shfaqjen e aktiviteteve të ardhshme.

Kështu, Siri mund të përgjigjet edhe ndaj pyetjeve të tilla si: “Në cilin restorant kam ngrënë të mërkurën e kaluar?” ose “Cili ishte kodi i derës që më dërguan me mesazh?”. Përgjigjet do të bazohen në të dhënat e ruajtura në pajisje.

Visual Intelligence integrohet në aplikacionin Camera

Funksioni “Visual Intelligence” është një tjetër prej veçorive të reja dhe do të jetë i integruar drejtpërdrejt në aplikacionin Camera.

Përmes kamerës, përdoruesi mund ta drejtojë iPhone-in drejt një objekti dhe të marrë menjëherë të dhëna rreth tij.

Një faturë restoranti, për shembull, mund të skanohet për të ndarë shpenzimet mes miqve. Po ashtu, kamera mund të drejtohet nga një vakt për të marrë informacione rreth vlerave ushqyese të tij.

Siri dhe Visual Intelligence pritet të jenë ndër faktorët kryesorë që do t’i nxisin shumë përdorues ta instalojnë iOS 27 menjëherë pas publikimit.

Personalizim më i madh i “Liquid Glass” dhe mjete të reja për kamerën

Apple ka zgjeruar mundësitë e personalizimit të ndërfaqes “Liquid Glass”, e cila u prezantua për herë të parë vitin e kaluar.

Ndryshime janë bërë edhe në aplikacionin Camera, ku janë shtuar mjete që e thjeshtojnë retushimin e fotografive.

Me këto mjete, përdoruesit mund t’i korrigjojnë më lehtë imazhet dhe, në raste të caktuara, të ndryshojnë edhe kornizimin e fotografisë pasi ajo të jetë shkrepur.

Modelet më të vjetra pritet të përfitojnë nga rritja e performancës

iOS 27 pritet të rrisë ndjeshëm shpejtësinë në një numër të madh pajisjesh iPhone. Përmirësimi mund të vërehet veçanërisht në modelet më të vjetra, përfshirë iPhone 11 dhe iPhone 12.

Ky optimizim mund t’ua zgjasë përdorimin këtyre pajisjeve dhe të ndikojë në mënyrë të dukshme në përvojën e përditshme të përdoruesve.

Ora e pritshme e publikimit

Sipas konfirmimit të Apple, iOS 27 do të publikohet sot, më 14 shtator. Kompania zakonisht nuk njofton një orar të saktë për shpërndarjen globale, por në Evropë përditësimi pritet të bëhet i disponueshëm gjatë mbrëmjes.

Për të kontrolluar nëse përditësimi ka mbërritur, përdoruesit duhet të hapin: Settings > General > Software Update.

Meqë bëhet fjalë për një skedar të madh, rekomandohet që pajisja të jetë e lidhur me Wi-Fi dhe të ketë bateri të mjaftueshme ose të jetë vendosur në karikim.

iPhone-t kompatibilë me iOS 27

Lista e modeleve që do të mbështesin iOS 27 përfshin: iPhone 17 Pro Max, iPhone 17 Pro, iPhone Air, iPhone 17, iPhone 17e, iPhone 16 Pro Max, iPhone 16 Pro, iPhone 16 Plus, iPhone 16, iPhone 16e, iPhone 15 Pro Max, iPhone 15 Pro, iPhone 15 Plus, iPhone 15, iPhone 14 Pro Max, iPhone 14 Pro, iPhone 14 Plus, iPhone 14, iPhone 13 Pro Max, iPhone 13 Pro, iPhone 13, iPhone 13 mini, iPhone 12 Pro Max, iPhone 12 Pro, iPhone 12, iPhone 12 mini, iPhone 11 Pro Max, iPhone 11 Pro, iPhone 11 dhe iPhone SE, gjenerata e dytë dhe modelet më të reja.

Apple flet për një Siri të gjeneratës së re

Craig Federighi, zëvendëspresident i lartë i Apple për inxhinierinë softuerike, deklaroi se kompania po e sjell gjeneratën e re të Apple Intelligence në të gjitha platformat e saj.

“Produktet e Apple janë një pjesë thelbësore e jetës së njerëzve dhe këtë vit po sjellim funksione të reja të fuqishme që do t’u japin përdoruesve edhe më shumë mundësi”, tha Federighi.

“Po sjellim gjeneratën e ardhshme të Apple Intelligence në platformat tona, po prezantojmë Siri AI, një Siri shumë më inteligjente, më të informuar dhe më të aftë, po zgjerojmë funksionet e sigurisë për fëmijët me mjete të reja intuitive për familjet dhe po i bëjmë platformat tona softuerike më të shpejta, më të besueshme dhe më të këndshme për përdorim.”

Përmes iOS 27, Apple synon të kombinojë risitë e reja me një përvojë më të mirë përdorimi edhe në modelet ekzistuese të iPhone-it, përfshirë pajisje që kanë disa vite në treg. /GazetaExpress/