Brikena dhe Mateo rrëfejnë në “Top Arena” çfarë diskutojnë gjatë telefonatave 7-orëshe

Mateo Borri dhe Brikena Selmani, dy ish-banorët e “Big Brother VIP 5”, kanë ndarë hollësi nga jeta private dhe raporti i tyre gjatë një bisede romantike në “Top Arena”.

Çifti zbuloi se komunikimi mes tyre në telefon mund të zgjasë deri në 7 orë.

Brikena e pyeti Mateon se në cilin moment kishte kuptuar që ajo ishte partnerja ideale për të.

Mateo u përgjigj se e ka të vështirë të dashurohet, pasi është një person me veçoritë e tij. Ai tregoi se, ndonëse jetonin së bashku në një shtëpi për 24 orë, kur Brikena mbante distancë, ai e ndiente mungesën e saj. Sipas tij, kur vuri re se ajo ndikonte drejtpërdrejt emocionalisht në humorin e tij, kuptoi se ishte femra e duhur. Mateo shtoi se dorën e Brikenës e ka puthur aq shumë herë sa nuk ia ka puthur askujt tjetër gjatë jetës së tij.

Brikena tha se ai vazhdon ta bëjë këtë gjest gjatë gjithë kohës edhe jashtë “BBV”, duke e cilësuar si pjesë të shumë çasteve emocionuese. Më pas, ajo ngriti pyetjen që, sipas saj, të gjithë dëshirojnë ta dinë: për çfarë flasin gjatë një telefonate që zgjat 7 orë?

Mateo shpjegoi se bisedat zakonisht fillojnë me pyetje rreth mënyrës se si u ka kaluar dita, çfarë kanë bërë dhe ku ndodhen. Më pas kalojnë në tema të ndryshme, pasi një bisedë sjell tjetrën.

Brikena e ndërpreu, duke i kërkuar të mos i tregonte të gjitha.

Mateo shtoi se komunikimi i tyre vijon në orën 12 të natës, në 2 pas mesnate dhe deri në katër të mëngjesit, kur më në fund i zë gjumi.