Trotinetët elektrikë u ndalohen nën 18-vjeçarëve, Kuvendi miraton ndryshimet ligjore

Në Kuvend është votuar Ligji për rregullimin e përdorimit të trotinetëve elektrikë, i cili vendos rregulla më të forta për lëvizjen e tyre dhe synon të rrisë sigurinë në trafik. Sipas dispozitave të reja, këto mjete do të lejohen të përdoren vetëm nga personat që kanë mbushur 18 vjeç. Gjithashtu, parashikohen kufizime për qarkullimin dhe udhëzime të qarta për mënyrën e përdorimit, me objektiv uljen e aksidenteve rrugore.

Ndryshimet ligjore parashohin edhe ndëshkime më të rrepta për shkeljet, duke përfshirë tejkalimin e shpejtësisë, drejtimin nën ndikimin e alkoolit dhe transportimin e personave të tjerë në trotinet. Për shkeljet më serioze, përveç gjobave, parashikohet edhe konfiskimi i përkohshëm i mjetit deri në 30 ditë.

Autoritetet thonë se këto ndryshime kanë për qëllim forcimin e sigurisë në rrugë, pasi statistikat tregojnë një rritje të aksidenteve ku përfshihen trotinetët dhe mjete të ngjashme, me raste që kanë sjellë lëndime të rënda dhe edhe viktima fatale.

Me ligjin e ri synohet që përdorimi i këtyre mjeteve, të cilat po bëhen gjithnjë e më të zakonshme në komunikacionin urban, të rregullohet më qartë dhe të ulet numri i aksidenteve.