Transportuesit e Strugës paralajmërojnë pezullimin e linjave nga 24 gushti

Rreth 30.000 banorë të fshatrave të Strugës rrezikojnë të mbeten pa transport publik, pasi 15 transportues kanë njoftuar se do të ndalojnë shërbimin e udhëtarëve duke nisur nga 24 gushti. Ata e lidhin këtë vendim me borxhet e papaguara prej vitesh nga Komuna e Strugës për transportin e nxënësve, si dhe me faktin se çmimi i biletave nuk ka ndryshuar që nga viti 2022.

Transportuesit i kanë kërkuar kryetarit të Komunës së Strugës, Mendi Qyra, dhe Këshillit komunal të shqyrtojnë kërkesat e tyre, në mënyrë që të mund ta vijojnë veprimtarinë. Disa prej tyre kanë ndaluar punën që sot.

Më 24 korrik, transportuesit i dërguan Komunës së Strugës një kërkesë me shkrim, duke i lënë afat 15 ditë për shlyerjen e borxhit dhe rishikimin e tarifave.

“Ne vendosëm të përballemi kështu me problemin e transportit publik, sepse mbajmë linja në distanca të mëdha. Rruga nga Struga deri në Misllodezhdë është rreth 20 kilometra dhe arrin deri në 950 metra lartësi mbidetare. Jemi munduar ta ruajmë këtë linjë dhe t’i shërbejmë popullsisë, por rritja e çmimeve të karburantit, pjesëve rezervë dhe kostove të mirëmbajtjes së automjeteve na ka bërë të paaftë t’i përballojmë të gjitha vështirësitë e përditshme. Fshati ynë është malor, ndërsa në këtë zonë përfshihen edhe Bogovica, Bërçeva, Prisovjani dhe vendbanime të tjera. Banorët e këtyre vendeve duhet ta kenë transportin të garantuar në kohë”, tha Flori Mena, transportues nga fshati Misllodezhdë.

Transportuesit shprehen se nuk mund të presin më gjatë për zgjidhjen e situatës. “Ne nuk mund të durojmë edhe një muaj, e jo më deri në muajin e 12-të të vitit 2026. Shpresonim se gjërat do të funksiononin dhe se do të përparonim, ndërsa borxhet e mëparshme do të paguheshin, jo që të rëndoheshim edhe më shumë me detyrime ndaj shkollave të mesme. Nuk e di si të vazhdojmë të punojmë; nëse ata e dinë, le të na tregojnë. Në fund i thashë edhe kryetarit të komunës: me çfarë zgjidhjeje mendoni të vazhdoni, do të sillni shoferë dhe autobusë nga Nepali?”, deklaroi Negovan Shumulikoski, transportues nga fshati Llozhan.

Kryetari i Komunës së Strugës, Mendi Qyra, e pranon se detyrimet janë të vjetra dhe janë grumbulluar ndër vite. “Ne kemi mundësi t’i shlyejmë borxhet e mbetura, por kjo normalisht do të realizohej brenda një periudhe prej tre deri në katër muaj, pasi pagesat po kryhen vazhdimisht. Ky borxh i përket pushtetit të mëparshëm dhe transportuesit duhet t’u kërkojnë llogari ish-kryetarëve të komunës dhe ish-funksionarëve, të cilët tani ndodhen në opozitë, për arsyen pse pagesat nuk janë bërë deri më tani”, tha Qyra.

Lidhur me tarifat e udhëtimit, Qyra deklaroi se ato do të rriten në përputhje me parametrat e përcaktuar në buxhet. Sipas tij, propozimi për rritjen e çmimeve do të paraqitet në mbledhjen e ardhshme të Këshillit. /Alsat.mk