Shkupi pret konferencën e drejtuesve të gjykatave supreme nga Evropa Qendrore dhe Lindore

Gjatë nesër dhe pasnesër, Shkupi do të jetë vendi ku do të zhvillohet konferenca e kryetarëve të gjykatave supreme nga Evropa Qendrore dhe Lindore. Organizimi i këtij aktiviteti bëhet nga Gjykata Supreme, në bashkëpunim me Institutin CEELI dhe me përkrahjen e Projektit të BE-së për sundimin e ligjit.

Sipas njoftimit, në këtë konferencë pritet të marrin pjesë kryetarë, zëvendëskryetarë dhe gjykatës nga 13 gjykata supreme të vendeve të Evropës Qendrore dhe Lindore. Po ashtu, të pranishëm do të jenë edhe Dejvid Kempbell, gjykatës i lartë i Qarkut, kryetar i Komitetit për Marrëdhënie Gjyqësore Ndërkombëtare në ShBA dhe anëtar i Bordit Këshillimor të Institutit CEELI, Barington Parker, gjykatës i lartë i Qarkut nga ShBA, si dhe Robert R. Strang, drejtor ekzekutiv i Institutit CEELI.

Fjalime në ceremoninë solemne të hapjes nesër do të mbajnë presidentja e shtetit, Gordana Siljanovska-Davkova, kryetari i Gjykatës Supreme të Republikës së Maqedonisë së Veriut, Afrim Fidani, kryetari i Këshillit Gjyqësor, Aleksandar Kambovski, si edhe Dejvid Kempbell, Robert Strang dhe Gzhegozh Borkovski nga Projekti i BE-së për mbështetjen e sundimit të ligjit.

Në programin e konferencës janë paraparë pesë sesione.

Seksioni i parë do të trajtojë besimin e publikut te gjyqësori. Në të dytin do të diskutohet për pavarësinë e gjyqësorit, ndërsa sesioni i tretë do t’i kushtohet zbatimit të ligjit nga gjykatat evropiane në rendin juridik të brendshëm, përkatësisht Gjykata e Drejtësisë e Bashkimit Evropian dhe Gjykata Evropiane e të Drejtave të Njeriut. Në sesionin e katërt fokusi do të jetë te përdorimet aktuale dhe të ardhshme të inteligjencës artificiale në procedurat gjyqësore dhe në administrimin e gjykatave, ndërsa sesioni i pestë do të trajtojë komunikimin e gjykatave me publikun për çështje me interes publik.