Shasivari: Marrëveshja e Ohrit mbetet një standard dhe përgjegjësi institucionale

Në seancën solemne të Qeverisë, sot përkujtuam 25-vjetorin e Marrëveshjes Kornizë të Ohrit, një moment historik që e orientoi vendin tonë drejt një etape të re paqeje, stabiliteti dhe bashkëjetese.

Në cilësinë e Ministrit të Drejtësisë, këtë përvjetor nuk e konsideroj vetëm si një rast për t’u kthyer te e kaluara. Mbi të gjitha, ai përfaqëson një përgjegjësi që kemi ndaj së ardhmes.

Marrëveshja e Ohrit nuk i përket thjesht historisë sonë si një dokument. Ajo përbën një standard dhe një detyrim institucional, të cilin duhet të vazhdojmë ta fuqizojmë përditë.

Sipas bindjes sime, drejtësia nuk duhet të zbatohet në mënyrë selektive, ndërsa barazia nuk mund të ekzistojë vetëm si parim i shkruar. Të dyja duhet të pasqyrohen në funksionimin e përditshëm të shtetit dhe në besimin që çdo qytetar ka ndaj institucioneve.

Pas 25 vitesh, mesazhi im mbetet i qartë: e ardhmja e vendit duhet të ngrihet mbi sundimin e ligjit, respektin, barazinë dhe dinjitetin e secilit qytetar.

Ky përvjetor na shërben për të rikujtuar rrugëtimin e deritanishëm, për të çmuar rezultatet e arritura dhe për t’i parë me përgjegjësi sfidat që na presin.

Institucionet kanë për detyrë të mos e konsiderojnë këtë Marrëveshje si një kapitull tashmë të mbyllur. Ajo vazhdon të jetë pjesë e procesit për krijimin e një shteti demokratik, të barabartë dhe të drejtë për të gjithë.

25 vjet paqe.

25 vjet përgjegjësi.

Detyra jonë e përbashkët është të ndërtojmë për të gjithë një të ardhme më të drejtë!