Sali: Rruga drejt BE-së duhet të sjellë përfitime të prekshme për qytetarët

Zëvendëskryeministri i Parë dhe Ministri për Çështje Evropiane, Bekim Sali, ishte pjesë e Konferencës për Ballkanin Perëndimor të zhvilluar në Vjenë, e organizuar me ftesë të ministres austriake për Evropën, Integrimin dhe Familjen, Claudia Bauer.

Gjatë debatit mbi perspektivën e rajonit, Sali deklaroi se zgjerimi i Bashkimit Evropian duhet të prodhojë rezultate konkrete për qytetarët edhe para anëtarësimit të plotë. Ai u ndal veçanërisht te të rinjtë, duke kërkuar më shumë mundësi për studime, formim profesional, praktika pune, kërkim shkencor dhe shkëmbime me vendet partnere të Evropës.

“Për të rinjtë tanë, e ardhmja evropiane duhet të nënkuptojë mundësi reale për të mësuar, për t’u zhvilluar dhe për ta ndërtuar të ardhmen e tyre në vendin e tyre”, u shpreh Sali.

Si shembuj të integrimit gradual, ministri përmendi lehtësimin e qarkullimit tregtar përmes Korsive të Gjelbra, përfshirjen në SEPA dhe bashkëpunimin në fushën digjitale. Sipas tij, këto janë përfitime të drejtpërdrejta që afrimi me BE-në mund t’u ofrojë qytetarëve dhe bizneseve.

Sali theksoi gjithashtu se zgjerimi i pjesëmarrjes në programet, politikat dhe tregun e përbashkët evropian duhet të mbështetet te kritere transparente, zbatimi i reformave dhe respektimi i sundimit të ligjit.

Ai përsëriti se Maqedonia e Veriut është e vendosur të vijojë reformat dhe të punojë për anëtarësimin në Bashkimin Evropian. Njëkohësisht, ministri kërkoi që procesi i zgjerimit të jetë i drejtë dhe i parashikueshëm, ndërsa rezultatet e vendeve kandidate të maten mbi bazën e kritereve objektive evropiane.

Në mbyllje të konferencës, Bekim Sali shprehu mirënjohje për Austrinë për organizimin e aktivitetit dhe për mbështetjen e saj të vazhdueshme ndaj perspektivës evropiane të Ballkanit Perëndimor./Telegrafi/