Reforma e pensioneve në Maqedoni pa vendim final, mosha e daljes në pension mund të shkojë deri në 73 vjeç

Ende nuk është marrë një vendim përfundimtar lidhur me reformimin e sistemit pensional dhe as për një rritje të mundshme të moshës së pensionimit. Ministrja e Financave, Gordana Dimitrieska-Koçoska, bëri të ditur se Qeveria fillimisht do të presë analizat dhe rekomandimet që do të hartohen nga Fondi Monetar Ndërkombëtar (FMN) dhe Banka Botërore, përpara se të përcaktojë hapat e ardhshëm.

Pas prezantimit të raportit dyvjeçar për punën e Ministrisë së Financave, ajo iu përgjigj interesimit të gazetarëve duke sqaruar se institucionet financiare ndërkombëtare do të përgatisin një vlerësim të thelluar të gjendjes së sistemit pensional. Sipas saj, vëmendje e veçantë do t’u kushtohet shtyllës së parë dhe të dytë të pensioneve, si dhe qëndrueshmërisë së tyre financiare në afat të gjatë.

Dimitrieska-Koçoska theksoi se këto analiza pritet të ofrojnë një tablo më të qartë për situatën, por sqaroi se kjo nuk nënkupton që Qeveria do të pranojë në mënyrë automatike çdo rekomandim që mund të dalë prej tyre. Ajo nënvizoi gjithashtu se një nga çështjet që mund të hapet nga këto vlerësime është edhe rritja e mundshme e moshës së pensionimit, megjithatë, për momentin kjo mbetet vetëm një mundësi dhe jo një propozim i konkretizuar.

Ministrja u shpreh se, në këndvështrimin e saj personal, duhet të krijohet më shumë fleksibilitet për qytetarët. Sipas saj, ata që kanë dëshirë dhe mundësi të vazhdojnë punën duhet ta kenë këtë mundësi, ndërsa qytetarët që duan të dalin në pension sipas rregullave aktuale nuk duhet të detyrohen të qëndrojnë më gjatë në punë. Ajo theksoi se profesionet ndryshojnë për nga kushtet e punës, ndaj edhe qasja duhet të jetë më elastike.

Sipas paralajmërimit të saj, problemi më i madh për sistemin pensional vazhdon të jetë zhvillimi i pafavorshëm demografik. Plakja e popullsisë dhe rënia e numrit të qytetarëve në moshë pune, tha ajo, paraqesin një kërcënim serioz për qëndrueshmërinë afatgjatë të fondit pensional, jo vetëm në Maqedoninë e Veriut, por edhe në pjesën më të madhe të vendeve evropiane.