Qyteti i Shkupit: Luna Parku i ri pritet të përfundojë deri në fund të vitit 2027

Qyteti i Shkupit njofton se projekti për ndërtimin e një Luna Parku modern do të realizohet brenda afatit të përcaktuar në programin e kryetarit të bashkisë, Orce Gjorgjievski, pra deri në fund të vitit 2027. Pas rreth një dekade pa këtë hapësirë të preferuar për fëmijët, parku synon të rikthejë argëtimin dhe aktivitetet familjare në qytet.

Sipas projektit, kompleksi i ri do të përmbajë atraksione për grupmosha të ndryshme. Krahas pajisjeve tradicionale argëtuese, vizitorët do të kenë në dispozicion një “roller coaster”, rrotë panoramike, atraksione me ujë, lojëra interaktive dhe zona të realitetit virtual.

Qyteti i Shkupit ka dhënë sqarime edhe për procedurat e prokurimit dhe ndërprerjen me marrëveshje të kontratës së lidhur pas tenderit të ri. Nga institucioni thonë se ky vendim shmang blerjen e dyfishtë të të njëjtave rekuizita dhe garanton përdorim më të përgjegjshëm të parave publike.

Pas ndërprerjes së kontratës së mëparshme për blerjen e rekuizitave, e nënshkruar gjatë mandatit të kryetarit të komunës Koce Trajanovski, kompania kishte paditur Qytetin e Shkupit. Gjykata vendosi në favor të kompanisë, duke e detyruar qytetin të paguajë për pajisjet, ndërsa kontrata e re ishte lidhur tashmë pas përfundimit të tenderit të ri.

Meqë procedura e re përfshinte edhe pajisjet e parashikuara në marrëveshjen e mëparshme, palët vendosën ta ndërpresin kontratën e re në mënyrë të ndërsjellë. Sipas Qytetit të Shkupit, kjo zgjidhje shmang përsëritjen e panevojshme të pajisjeve dhe shpenzimet shtesë për buxhetin e qytetit.

Institucioni sqaron se vendimi për kontratën nuk ndikon në afatin e parashikuar për përfundimin e Luna Parkut të ri.

“Brenda një muaji do të nisë vendosja e shtatë pajisjeve të blera në bazë të kontratës së mëparshme. Në të njëjtën kohë do të vijojë edhe peizazhi i zonës, në mënyrë që kjo pjesë e parkut të krijojë kushtet për të nisur funksionimin”, thuhet në njoftimin e Qytetit të Shkupit./Telegrafi/