Propozim-ligji synon kalimin në punësim të përhershëm: kush përfshihet dhe cilat institucione përjashtohen

Deri më 31 dhjetor 2027, një pjesë e punonjësve me angazhim të përkohshëm në sektorin publik mund të fitojnë statusin e të punësuarve të përhershëm.

Masa parashihet në një propozim-ligj të paraqitur nga një grup deputetësh, i cili po shqyrtohet me procedurë të shkurtuar.

Kalimi në marrëdhënie të përhershme do të zhvillohet në dy etapa: deri në 50 për qind e të angazhuarve mund të punësohen menjëherë, kurse pjesa e mbetur deri në fund të vitit 2027. Institucionet do të kenë afat 90-ditor për t’i përgatitur kontratat dhe vendimet përkatëse.

Propozimi përfshin të angazhuarit me kontrata në vepër, kontrata autoriale, kontrata me afat të caktuar ose përmes agjencive të punësimit të përkohshëm. Nuk kërkohet që angazhimi paraprak të ketë zgjatur një periudhë minimale.

Megjithatë, kalimi në punësim të përhershëm nuk bëhet vetvetiu. Personat duhet të plotësojnë kriteret e pozitës, ndërsa procesi kërkon edhe miratimin e Ministrisë së Financave. Ministria mund ta refuzojë kërkesën nëse buxheti nuk ka fonde të mjaftueshme.

Jashtë fushëveprimit të ligjit mbeten shkollat fillore e të mesme, universitetet, institucionet shkencore, MPB-ja, Agjencia e Sigurisë Kombëtare, Agjencia e Inteligjencës dhe disa institucione të tjera.

Pas 1 janarit 2028, numri i punëtorëve që institucionet mund të angazhojnë përkohësisht nuk do të lejohet të kalojë 10 për qind të numrit të përgjithshëm të të punësuarve.

Propozimi nuk tregon numrin e personave që mund të përfitojnë dhe as koston e përgjithshme të procesit. Sipas propozuesve, një pjesë e shpenzimeve mbulohet tashmë nga kontratat që janë në fuqi.

Ligji është dorëzuar për miratim me procedurë të shkurtuar dhe, sipas propozimit, do të hyjë në fuqi ditën kur publikohet në „Gazetën Zyrtare“.