VLEN kërkon kalimin e kontratave të përkohshme në punësim të përhershëm, BDI paralajmëron rrezikun e favorizimeve partiake

VLEN ka paraqitur një propozim ligjor për shndërrimin në marrëdhënie pune pa afat të të gjithë personave që plotësojnë kriteret ligjore dhe që janë të angazhuar në institucionet publike të përfshira në këtë nismë.

Sipas deputetit Zeqirja Tahiri, nisma mbulon forma të ndryshme të angazhimit, përfshirë kontratat me afat të caktuar, kontratat në vepër, kontratat autoriale, punësimet përmes agjencive, si dhe mënyra të tjera kontraktuale për kryerjen e punës.

Tahiri bëri të ditur se, pas hyrjes në fuqi të ligjit, institucionet do të kenë 90 ditë kohë për lidhjen e kontratave përkatëse ose për nxjerrjen e vendimeve të punësimit. Ai shtoi se gjatë kësaj periudhe parashikohet edhe mbrojtja e punonjësve nga ndërprerja e kontratave, me përjashtim të rasteve kur shkelen detyrimet kontraktuale. Sipas tij, synimi është që punonjësit të kenë siguri deri në përfundimin e procesit të ndryshimit të statusit të tyre.

Deputetja e BDI-së, Diana Toska, shprehu rezerva lidhur me propozimin për kalimin e kontratave të përkohshme në marrëdhënie të rregullta pune. Ajo paralajmëroi se kjo zgjidhje mund të shfrytëzohet për punësime partiake dhe për sistemimin e personave të afërt me pushtetin.

Diana Toska deklaroi se shqetësimi i BDI-së shtohet edhe për shkak se, në të njëjtën kohë, shumica parlamentare po krijon mekanizma që mund të çojnë në ndërprerjen e marrëdhënieve të punës për punonjësit administrativë.

Propozim-ligji pritet të kalojë për shqyrtim në Kuvend. Mbetet për t’u parë nëse ai do t’u ofrojë stabilitet punonjësve me kontrata të përkohshme apo do të shkaktojë debate të reja për mënyrën e zbatimit të tij.