Prokuroria kundërshton garancinë e Dejan Jovanovit, nesër i skadon paraburgimi njëvjeçar

Prokuroria që trajton rastin e zjarrit në diskotekën “Pulse” në Koçan dha sot një mendim negativ dhe kërkoi hedhjen poshtë si të pabazuar të propozimit për caktimin e garancisë, të paraqitur nga i akuzuari Dejan Jovanov.

Sipas njoftimit të Prokurorisë, në propozim kërkohej që gjykata të caktojë ndaj të akuzuarit një masë garancie në vlerën totale prej 195.820 eurosh, ekuivalente me 12.042.932 denarë, e cila do të mbulohej me hipotekë mbi pasurinë e paluajtshme.

Megjithatë, sipas Prokurorisë, gjatë vendimmarrjes gjykata duhet të vlerësojë veçanërisht faktin që deklarata me të cilën jepet pëlqimi që prona e ofruar të lihet si garanci është dhënë nga i akuzuari Dejan Jovanov, edhe pse ai ishte në dijeni se një pjesë e pasurisë së paluajtshme të ofruar ndodhej nën ekzekutim dhe nuk mund të hipotekohej e aq më pak të arkëtohej.

Përveç kësaj, Prokuroria thekson se pasuria e paluajtshme e ofruar përbëhet kryesisht nga ambiente ndihmëse, ndërtesa, hambarë dhe stalla, të cilat më parë kishin qenë ndërtime pa leje; në rast nevoje, kjo pronë do të ishte jashtëzakonisht e vështirë të kthehej në para të gatshme, e sigurisht jo në shumën me të cilën është vlerësuar.

Nesër i skadon paraburgimi njëvjeçar i të akuzuarit të parë Dejan Jovanov-Deko në rastin e zjarrit në “Pulse”, që është maksimumi ligjor nga dita e vlerësimit të aktakuzës./Telegrafi/