Prokuroria kërkon paraburgimin e 41-vjeçares nga Kratova për uzurpimin e “Kuklicës” dhe sulmin ndaj policëve

Prokurori publik i Prokurorisë Themelore Publike në Kumanovë i ka paraqitur gjykatës kompetente kërkesë për caktimin e masës së paraburgimit ndaj një gruaje 41-vjeçare nga Kratova. Ajo është arrestuar dje dhe po hetohet për pengim të zyrtarëve gjatë ushtrimit të detyrave zyrtare dhe për uzurpim, bëri të ditur Prokuroria Publike.

Sipas njoftimit, pavarësisht masave të ndërmarra deri tani, e dyshuara prej një kohe të gjatë vazhdon të mbajë të uzurpuar lokalitetin “Kuklicë”, i shpallur monument natyror me dekret. Ajo u kërkon vizitorëve tarifa hyrjeje pa bazë ligjore, përfshihet në debate me ta dhe i kërcënon, duke shkaktuar vazhdimisht cenim të rendit dhe qetësisë publike.

Gjatë incidentit të fundit, 41-vjeçarja dyshohet se ka kryer edhe veprën penale “Pengimi i një zyrtari në kryerjen e veprimeve zyrtare”. Konkretisht, ajo ka sulmuar fizikisht dhe ka penguar policët që po përpiqeshin ta identifikonin dhe ta ndalonin.

Për kërkesën e paraburgimit, prokurori ka marrë në konsideratë edhe faktin se ndaj saj po zhvillohet një procedurë për veprën penale të stërzgjatur të uzurpimit të lokalitetit “Kuklicë”. Në kuadër të këtij rasti, ndaj saj janë vendosur më herët masa paraprake, mes tyre edhe ndalimi i vizitës në atë lokacion, vendim që ajo nuk pranon dhe nuk e respekton.

Prokuroria njoftoi gjithashtu se e dyshuara dhe bashkëshorti i saj më herët kanë marrë pjesë në veprime për pengimin e një zyrtari gjatë kryerjes së detyrave zyrtare ndaj inspektorëve të tregut.