PLD: Disa ujqër u arratisën nga kafazi në Kopshtin Zoologjik të Shkupit dhe shqyen disa kangurë e zogj

PLD kërkon reagim të menjëhershëm nga Kopshti Zoologjik, Qyteti i Shkupit, Agjencia e Ushqimit dhe Veterinarisë, si edhe nga të gjitha institucionet përgjegjëse, pas incidentit të së shtunës, kur ujqërit e bardhë dolën nga kafazi dhe hëngrën 4 kangur dhe disa zogj emu.

Sipas tyre, Kopshti Zoologjik po përballet me një varg ngjarjesh të pakëndshme që prej fillimit të mandatit të ish-kryetares Danella Arsovska.

Ata kujtojnë se Kopshti Zoologjik i Shkupit është kthyer në një vend ku kuajt për ushqim në kopsht u therën, me gjak të derdhur në Bulevardin Ilinden, ndërsa kafshë kanë ngordhur vazhdimisht në rrethana të paqarta. Mes tyre përmenden gjirafat, një elefant, një shqiponjë perandorake, luani Zika, më pas kuajt e rrallë dhe të mbrojtur të Przevalskit, delet barbare, si dhe një epidemi e gripit të shpendëve.

Pas disa orësh ndjekjeje nga punonjësit, ujqërit u kthyen në hapësirat e tyre, por Kopshti Zoologjik nuk e njoftoi askënd për këtë ngjarje, ndonëse bëhet fjalë për një vend me shumë vizitorë, ku siguria e tyre mund të vihet në pikëpyetje”, thonë nga PLD.

Ata kërkojnë që drejtuesit e Kopshtit Zoologjik dhe të Qytetit të Shkupit të japin shpjegim për incidentin, të sqarojnë nëse habitatet e kafshëve, sidomos ato që paraqesin rrezik për jetën, janë të mbrojtura siç duhet, dhe ta mbyllin kopshtin zoologjik për vizitorët derisa të sqarohet rasti dhe të përcaktohet përgjegjësia./Telegrafi/