Përhapja e etheve të Nilit Perëndimor, shpallet epidemi në disa komuna të Shkupit

Në disa zona të prekura të Shkupit është shpallur epidemi që nga dje, bëri të ditur Zlatko Arsienievski nga Qendra e Shëndetit Publik Shkup. Masa përfshin komunat Kisella Voda, Gazi Babë, Aerodrom, Butel dhe Ilinden, si edhe vendbanimet Draçevë, Përzhinë, Lisiçe e Poshtme, Kadino dhe Jurumleri.

Ministria e Shëndetësisë sqaroi se ethet e Nilit Perëndimor nuk janë një sëmundje e re, pasi raste të saj janë regjistruar edhe në vitet e mëparshme.

Andovski theksoi se publiku po njoftohet me kohë dhe në mënyrë transparente për gjendjen. Sipas tij, këtë vit është bërë i domosdoshëm një reagim më i fuqishëm institucional për shkak të situatës aktuale epidemiologjike, numrit të rasteve të konfirmuara dhe aktivitetit të virusit.

Ai tha se zhvillimet po monitorohen në bashkërendim me Institutin e Shëndetit Publik, Qendrat e Shëndetit Publik, Komisionin për Sëmundje Infektive dhe Klinikën e Sëmundjeve Infektive. Synimi është që rastet të zbulohen dhe të marrin trajtim në kohë, ndërsa njëkohësisht të parandalohet paraqitja e rasteve të reja.

Sipas Andovskit, nuk ka arsye për panik, por qytetarët duhet të tregojnë kujdes dhe përgjegjësi. Ai u bëri thirrje të zbatojnë masa mbrojtëse personale, të përdorin veshje të përshtatshme dhe të mos frekuentojnë vende ku rreziku i ekspozimit ndaj mushkonjave është më i lartë.

Ministria e Shëndetësisë njoftoi se do të vijojë ta informojë opinionin publik në kohë dhe me transparencë për çdo ndryshim të rëndësishëm në situatën që lidhet me këtë sëmundje.