Pagesat e vonuara të subvencioneve bujqësore do të likuidohen pas rishikimit të Buxhetit, njofton Hoxha

Zëvendësministri i Bujqësisë, Albrim Hoxha, njoftoi se fermerët do të marrin pagesat e subvencioneve të akumuluara sapo të miratohet rishikimi i Buxhetit, i cili po shqyrtohet aktualisht në Kuvend.

Gjatë fjalës së tij në seancë plenare, Hoxha trajtoi çështje që lidhen me sigurinë ushqimore dhe përkrahjen për sektorin bujqësor.

Ai nënvizoi se autoritetet përkatëse po kryejnë inspektime të vazhdueshme për të siguruar standardet ushqimore, duke vepruar gjithmonë në përputhje me kuadrin ligjor ekzistues për të mbrojtur shëndetin publik dhe për të ruajtur cilësinë.

Sipas tij, rishikimi buxhetor do të mundësojë fondet e nevojshme për të mbuluar pagesat e subvencioneve dedikuar prodhimit të qumështit, gjedhëve të identifikuara, grurit, kulturave të tjera drithërore dhe atyre fushore.

Hoxha zbuloi gjithashtu se Agjencia po përmbyll testimin e një platforme të re dixhitale për aplikimet për subvencione që do të përdoret në vitin 2026. Për të mos penalizuar asnjë fermer, afati përfundimtar për dorëzimin e kërkesave është zgjatur deri në fund të muajit shtator dhe sistemi i ri pritet të jetë funksional në një të ardhme shumë të afërt.

Në mbyllje, zv.ministri Hoxha rikonfirmoi se përkrahja e fermerëve është në qendër të angazhimit të institucionit, duke u zotuar për pagesa të rregullta, mekanizma më të shpejtë dhe politika që u japin stabilitet dhe vizion afatgjatë atyre që e sigurojnë jetesën nga toka.