OBRM-PDUKM akuzon Zaevin se përcakton çmimin e specit të kuq

Pas tri ditësh protestash të fermerëve në Strumicë kundër çmimit të ulët prej 25 denarësh për specin e kuq, OBRM-PDUKM, e cila është në pushtet, iu përgjigj kritikave të LSDM-së me pretendimin se çmimi përcaktohet nga biznesi familjar i ish-kryeministrit Zoran Zaev.

“Është hipokrizi që LSDM-ja të përfshihet në një përplasje dhe përllogaritje politike lidhur me blerjen e specave. Fermerët që përballen me probleme në shitje e dinë shumë mirë se ndër blerësit më të mëdhenj është Mamas Ajvar, në pronësi të Zoran Zaevit”, deklaroi OBRM-PDUKM.

Partia ngre gjithashtu dyshime nëse çmimet e ulëta të blerjes po mbahen në mënyrë të vetëdijshme dhe të qëllimshme për qëllime politike, në mënyrë që LSDM-ja të përfitojë, ndërsa Zoran Zaev, së bashku me Venko Filipçen, shijon jahtin milionëdollarësh në Detin Egje.

“Nëse SDS-ja do të paraqesë sërish një kërkesë për blerjen e specave, ajo duhet t’ia drejtojë blerësit më të madh, Mamas Ajvarit dhe Zoran Zaevit. Ajo që mbetet e paqartë është se nga i përcakton Zoran Zaev çmimet: nga Porto Karasi apo nga Santorini?”, thuhet në reagimin e OBRM-PDUKM-së.

Ndërkohë, ministri i Bujqësisë, Borçe Serafimovski, pritet të prononcohet sot për mediat para ambienteve të njësisë rajonale në Strumicë, lidhur me blerjen e specit “Kurtovska Kapija”.