Një në dhjetë fëmijë 12-17 vjeç në Maqedoni, viktima të shfrytëzimit seksual online

Sipas hulumtimit “Disrupting Harm”, një program shumëvjeçar i financuar nga Safe Online dhe i zbatuar nga ECPAT International, INTERPOL dhe Zyra e UNICEF-it për Kërkime dhe Parashikime – Innocenti, në partneritet me institucione e organizata kombëtare, një në dhjetë fëmijë në Maqedoni të moshës 12 deri në 17 vjeç janë përballur me abuzim dhe shfrytëzim seksual të ndërmjetësuar nga teknologjia.

Gjatë prezantimit të sotëm të gjetjeve, përfaqësuesja e UNICEF-it në Maqedoni, Leslie Miller, theksoi se raporti përfshin zërat dhe rastet e raportuara nga fëmijët, si dhe të dhëna nga familjet dhe profesionistët e angazhuar në mbrojtjen e fëmijëve, arsimin, policinë dhe drejtësinë.

Duke cituar të dhënat e vitit në shqyrtim, Miller bëri të ditur se një në dhjetë fëmijë të moshës 12 deri në 17 vjeç kishin përvojë me shfrytëzim seksual të mbështetur teknologjikisht, që përkthehet në rreth 12 mijë fëmijë në mbarë vendin. Pothuajse gjysma e tyre përjetuan më shumë se një formë abuzimi, ndërsa 88 për qind ia rrëfyen një të afërmi të ngushtë ose një shoku. Megjithatë, vetëm një për qind e raportoi abuzimin tek autoritetet. Djemtë dhe vajzat abuzohen në mënyrë të barabartë, dhe në shumë raste abuzuesi është dikush që fëmija e njeh: një shok, partner intim, i njohur ose anëtar i familjes.

Ajo sqaroi se ky hulumtim është zbatuar në 25 vende të botës dhe përfaqëson një nismë globale me vlerë unike. Miller theksoi se studimi i ndihmon ata të kuptojnë jo vetëm situatën me të cilën përballen fëmijët, por edhe ku po dështon sistemi dhe ku nevojitet forcimi i tij.