HERA kundërshton heqjen e edukimit seksual: Është një mekanizëm mbrojtës për fëmijët

Asociacioni HERA ka reaguar pas deklaratës së ministres së Arsimit dhe Shkencës, Vesna Janevska, lidhur me heqjen e lëndës zgjedhore “Edukimi seksual” nga shkollat e mesme.

Sipas organizatës, largimi i kësaj lënde dhe programi përkatës nga arsimi i mesëm rrezikon t’i lërë të rinjtë pa një instrument të rëndësishëm për të kuptuar dhe parandaluar rreziqet me të cilat mund të përballen.

HERA thekson se edukimi seksual nuk përbën kërcënim për fëmijët. Përkundrazi, ai i ndihmon ata të kuptojnë rëndësinë e pëlqimit, të përcaktojnë kufijtë personalë, të dallojnë abuzimin, të krijojnë marrëdhënie të shëndetshme dhe të kërkojnë mbështetje në rast rreziku.

Të dhënat e cituara nga organizata tregojnë se rreth 10% e fëmijëve të moshës 12 deri në 17 vjeç në Maqedoninë e Veriut, ose afërsisht 12 mijë fëmijë, janë përballur me shfrytëzim dhe abuzim seksual përmes teknologjisë brenda një viti.

HERA sjell në vëmendje edhe shifra të tjera: 8% e fëmijëve kanë parë imazhe seksuale, 5% kanë marrë kërkesa të padëshiruara për fotografi ose video intime, ndërsa 4% janë kërcënuar me publikimin e materialeve intime.

Në 78% të rasteve, abuzuesi ka qenë një person i njohur për fëmijën. Ndërkohë, më shumë se gjysma e rasteve të shfrytëzimit seksual janë kryer përmes rrjeteve sociale.

Organizata e quan veçanërisht alarmante të dhënën se vetëm 19% e fëmijëve të anketuar kanë pohuar se kanë marrë ndonjë formë edukimi seksual.

Sipas të dhënave për shëndetin seksual dhe riprodhues, gjatë vitit 2024 kanë lindur 588 fëmijë nga nëna të moshës 15 deri në 19 vjeç. Po ashtu, brenda vetëm një muaji janë regjistruar 11 raste të reja me HIV.

HERA nënvizon se edukimi seksual është masë mbrojtëse dhe i referohet hulumtimit ndërkombëtar “Disrupting Harm”, të realizuar nga UNICEF, INTERPOL dhe ECPAT International. Ky studim rekomandon që programet shkollore të përfshijnë edukim të përshtatur për moshën mbi marrëdhëniet, kufijtë dhe pëlqimin.

“Pse hiqet pikërisht mjeti që duhet t’i mbrojë fëmijët?”, pyet HERA.

Organizata u drejtohet institucioneve me shqetësimin se, në një kohë kur fëmijët përballen çdo ditë me dhunë, abuzim, shantazh dhe dezinformim në internet, po largohet mjeti që duhet t’i ndihmojë ata t’i njohin dhe t’u shmangen këtyre rreziqeve.

Sipas HERA-s, heqja e edukimit seksual nuk i eliminon rreziqet që ekzistojnë në shoqëri dhe në internet. “Fëmijëve nuk u duhet më pak arsimim, por më shumë njohuri, më shumë parandalim dhe më shumë mbrojtje”, shprehet organizata.