Nikolloski: Brenda 5 vitesh, treni i shpejtë do ta lidhë Shkupin me Selanikun për 1 orë e 25 minuta dhe me Beogradin për 2 orë e gjysmë

Zëvendëskryeministri Aleksandar Nikolloski deklaroi në Selanik, gjatë Samitit të Ministrave të Transportit të vendeve të Ballkanit Perëndimor, se brenda pesë vitesh pritet të ndërtohet një hekurudhë me shpejtësi të lartë, e cila do ta shkurtojë udhëtimin nga Shkupi në Selanik në 1 orë e 25 minuta dhe drejt Beogradit në 2 orë e gjysmë.

Ai bëri të ditur se Maqedonia ka hyrë në një periudhë të zhvillimit intensiv infrastrukturor dhe se nisja do të bëhet me ndërtimin e hekurudhës së shpejtë në Korridorin 10, nga kufiri me Serbinë deri te kufiri me Greqinë. Sipas tij, do të mundësohet transport i mallrave me shpejtësi deri në 200 kilometra në orë, ndërsa transporti i pasagjerëve do të arrijë deri në 160 kilometra në orë, gjë që, siç tha ai, do ta transformojë tërësisht ekonominë.

Në fjalën e tij, Nikolloski nënvizoi se shtetet që shtrihen përgjatë Korridorit 10 duhet të përqendrohen në përmbylljen dhe modernizimin e këtij korridori, duke e cilësuar këtë si kusht për rritje të qëndrueshme ekonomike dhe për një sistem transporti më efikas.

Ai theksoi se, nëse Korridori 10 shfrytëzohet me mençuri, ekonomia e Evropës Juglindore dhe Qendrore mund të ndryshojë rrënjësisht. Sipas tij, tashmë ekziston një hekurudhë me shpejtësi të lartë mes Athinës dhe Selanikut, ndërsa linja Beograd – Budapest është përfunduar. Po ashtu, tha se kolegët nga Serbia po punojnë në segmentin Beograd – Nish, ndërsa hallka që mungon mbetet pjesa mes Nishit, Shkupit dhe Selanikut.

Nikolloski shtoi se pala e tyre tashmë ka nisur një program shumë ambicioz dhe është pranë finalizimit të tij, çka nënkupton fillimin e ndërtimit të hekurudhës me shpejtësi të lartë përgjatë gjithë Korridorit 10, nga kufiri me Serbinë deri te kufiri me Greqinë. Ai sqaroi se kjo linjë do të ketë shpejtësi nga 160 deri në 200 kilometra në orë për trafikun e pasagjerëve dhe 120 kilometra në orë për trafikun e mallrave.

Sipas tij, synimi është që projekti të përfundojë brenda 5 vjetësh, ndërsa vlera e tij do të jetë të paktën 2 miliardë euro. Financimi, tha ai, është siguruar përmes Marrëveshjes së Partneritetit Strategjik të nënshkruar me Mbretërinë e Bashkuar, me kushte shumë të favorshme.

“Kjo do të thotë se po fillojmë dhe mendoj se në jo më shumë se 5 vjet do të ketë një hekurudhë me shpejtësi të lartë. Një hekurudhë që mund ta përdorim për mallra, por edhe për pasagjerë. Kjo do ta ndryshojë realitetin në rajon. Shkup – Selanik do të zgjasë 1 orë e 25 minuta. Shkup – Beograd do të zgjasë 2 orë e gjysmë, kështu që ky është një realitet krejtësisht, krejtësisht i ndryshëm. Dhe një tren mallrash nga Athina do të arrijë në Vjenë në më pak se 24 orë, dhe nga Selaniku në Budapest në rreth 12 deri në 14 orë, që është një ndryshim i plotë në realitet”, tha Nikolloski.

Samiti po organizohet nga Sekretariati i Komunitetit të Transportit dhe fokusohet te prioritetet infrastrukturore dhe sfidat e investimeve në Ballkanin Perëndimor. Përveç ministrave, në këtë takim merr pjesë edhe Komisioneri Evropian për Transport dhe Turizëm të Qëndrueshëm, Apostolis Tsitsikostas.