Nikolloski njofton ndërtimin e dy linjave të reja hekurudhore në Shkup

Ndërtimi i një linje të shpejtë hekurudhore që do të lidhë drejtpërdrejt Stacionin e Ri Hekurudhor me Aeroportin Ndërkombëtar në Petrovec pritet të nisë pranverën e ardhshme në Shkup.

Zëvendëskryeministri dhe ministri i Transportit, Aleksandar Nikolloski, ka bërë të ditur se udhëtimi nga qendra e qytetit deri në terminalin e aeroportit do të zgjasë vetëm 8 deri në 11 minuta.

Kjo nismë është pjesë e planit për modernizimin e hekurudhave dhe ndryshimin e mënyrës së transportit publik në kryeqytet.

Autoritetet po planifikojnë zgjerimin e rrjetit pas vënies në funksion të linjës së parë të trenit urban. Në afërsi të lagjes “11 Oktomvri Baraka”, në Komunën e Kisella Vodës, pritet të ndërtohet një pikë e re hekurudhore. Gjithashtu, parashikohet krijimi i pikave për biçikleta dhe përshtatja e orareve me linjat e transportit publik të JSP-së.

Plani përfshin edhe ndërtimin e dy linjave të tjera hekurudhore.

Linja e dytë do të përshkojë itinerarin Stacioni i Ri – Autokomandë – Maxhari – Çento – Ilinden – Agino Sellë.

Linja e tretë do të lidhë Volkovo – Gjorçe Petrov – Shkup Veri – Butel – Stacioni i Ri.

Nikolloski deklaroi se qytetarët e kanë pritur pozitivisht trenin urban që në ditët e para. Sipas tij, përdorimi i trenave elektrikë do të reduktojë ndjeshëm kohën e udhëtimit nga zonat periferike drejt qendrës së qytetit.

Paralelisht, Ministria e Transportit po ndërmerr hapa për rinovimin e flotës hekurudhore.

Nëpërmjet Bankës Evropiane për Rindërtim dhe Zhvillim (BERZH), po sigurohen pesë lokomotiva të reja elektrike, të cilat do të përdoren për elektrifikimin e transportit të mallrave.

Ndërsa, në bashkëpunim me Bankën Botërore, po përmbyllet procedura për blerjen e 4 deri në 6 trenave të rinj modernë për udhëtarë. Trenat do të jenë në përputhje me standardet evropiane dhe do të kenë hapësira të posaçme për biçikleta dhe kafshë shtëpiake.