Në mbyllje të mandatit, Islam Abazi pyet: Cilin funksionar të BDI-së kam mbrojtur unë?

Në përgjigje të pyetjes së një gazetari nëse e konsideron si dështim faktin që mandatin e tij, i cili mbaron në nëntor, do ta përfundojë pa asnjë aktakuzë ndaj ndonjë funksionari të BDI-së, kreu i Prokurorisë për Ndjekjen e Krimit të Organizuar dhe Korrupsionit, Islam Abazi, reagoi me kundërpyetje. “Cila është ajo kallëzim penal ndaj funksionarëve të BDI-së që ka mbërritur në Prokurorinë për Ndjekjen e Krimit të Organizuar dhe Korrupsionit, por nuk është proceduar? Kë nga BDI-ja kam mbrojtur unë?”, deklaroi ai. Pyetja iu bë duke pasur parasysh se mandati i tij kishte nisur mes publikimit të fotografive me drejtues të BDI-së ose me persona të afërt me ta.

Abazi u ndal edhe te çështja “Soravia”, për të cilën Prokuroria kishte nisur procedurë me nismë vetjake pas informacioneve të siguruara. Në këtë rast, i dyshuar është Drin Ahmedi, nipi i liderit të BDI-së, Ali Ahmeti. Lënda prej vitesh vazhdon të mbetet në fazën e hetimeve paraprake.

Sipas të dhënave për këtë rast, Ahmedi, bashkë me një kompani nga Shqipëria, u bënë pronarë të qendrës afariste pa investuar mjete të tyre, duke shfrytëzuar një kredi bankare. Ndërkohë, për “Soravian” është nisur edhe procedurë falimentimi, ndërsa Ahmedi është larguar nga kompania që kishte në pronësi një pjesë të kësaj qendre.

Siç sqaroi Abazi, rasti vazhdon të jetë në fazën e hetimeve paraprake dhe Prokuroria ka qenë në pritje të përgjigjes për një kërkesë për ndihmë juridike ndërkombëtare nga Shtetet e Bashkuara të Amerikës. Pasi të arrijë kjo përgjigje, prokurori do të vlerësojë nëse do të merret një vendim prokurorial ose nëse do të kërkohen informacione shtesë.

Lidhur me hetimet paraprake që po zgjasin prej kohësh për mbikëqyrjen e projektit “Bechtel & Enka”, Abazi tha se Prokuroria i kishte dhënë urdhër për veprim Ministrisë së Punëve të Brendshme (MPB), ndërsa kjo Ministri, sipas tij, ka vepruar në mënyrë intensive. “Lëndët janë voluminoze dhe komplekse”, u shpreh Abazi.