MPB: Brenda gjashtë orësh u sanksionuan 222 drejtues motoçikletash

Ministria e Punëve të Brendshme njoftoi se gjatë një aksioni disaorësh janë evidentuar 222 kundërvajtje në trafik nga drejtues motoçikletash, ndërsa 14 persona janë arrestuar për drejtim të papërgjegjshëm.

Kontrolli aksional u realizua dje, më 05.08.2026, nga ora 17:00 deri në orën 23:00, në të gjithë territorin e Republikës së Maqedonisë së Veriut. Aksioni kishte për qëllim zbulimin dhe ndëshkimin e shkeljeve të kryera nga drejtuesit e motoçikletave.

Nga 222 drejtuesit e sanksionuar, 186 nuk kishin vendosur kaskë mbrojtëse gjatë vozitjes. Gjithashtu, 14 drejtues u privuan nga liria për veprën penale të parashikuar në nenin 297-a të Kodit Penal dhe të gjithë kishin drejtuar mjetin pa leje vozitjeje. Gjatë aksionit u sekuestruan edhe 14 motoçikleta.

Përveç këtyre rasteve, kontrollet çuan në shqiptimin e masave edhe për 197 kundërvajtje të tjera në trafik.

Nga MPB-ja bëjnë të ditur se kontrollet rrugore do të vijojnë edhe gjatë ditëve në vazhdim. Ministria u bën thirrje të gjithë pjesëmarrësve në trafik që të zbatojnë rregullat dhe dispozitat, duke kontribuar së bashku për rrugë më të sigurta.