MPB: 20.976 shkelje të evidentuara në trafikun e Maqedonisë gjatë korrikut

Kontrollet e zhvilluara nga zyrtarët policorë të të gjithë sektorëve të punëve të brendshme në rrugët e vendit, gjatë periudhës 01.07.2026–31.07.2026, kanë rezultuar me lëshimin e gjithsej 20.976 urdhërpagesave. Sipas MPB-së, 4.241 prej këtyre shkeljeve janë kryer nga drejtues që kanë tejkaluar shpejtësinë e lejuar.

Gjatë muajit korrik, 496 persona janë privuar nga liria për drejtim të pakujdesshëm të automjetit. Prej tyre, 81 janë ndaluar për drejtim nën ndikimin e alkoolit, 373 për drejtim pa patentë shoferi, ndërsa 25 për shkak të një ndalimi të mëparshëm për drejtimin e automjetit motorik. Në këtë grup përfshihen edhe tre persona që kanë drejtuar me shpejtësi mbi kufirin e lejuar brenda vendbanimit, 13 që kanë tejkaluar shpejtësinë jashtë vendbanimit dhe një person që ka drejtuar në drejtim të ndaluar.

Statistikat e aktiviteteve policore tregojnë gjithashtu se në të njëjtën periudhë janë sekuestruar 332 automjete, në bazë të nenit 300-b të Kodit Penal. Për parkim të parregullt janë regjistruar 4.694 shkelje, ndërsa 430 drejtues janë sanksionuar për ngasje nën ndikimin e alkoolit.

Në zbatim të Ligjit për Sigurinë në Trafikun Rrugor, masat ndëshkuese kanë prekur edhe 2.073 drejtues motoçikletash që nuk kanë përdorur helmetën mbrojtëse. Për mosvendosjen e rripit të sigurimit janë sanksionuar 1.829 pjesëmarrës në trafik.

Sipas Ligjit për Automjetet, 299 automjete janë nxjerrë jashtë qarkullimit pasi nuk ishin të regjistruara, ndërsa 125 për shkak të parregullsive teknike. Po ashtu, 44 shoferë janë ndëshkuar për mosplotësimin e kushteve ligjore lidhur me errësimin e xhamave të automjeteve me folie, njoftojnë nga MPB.

Ministria e Punëve të Brendshme u ka bërë thirrje të gjithë pjesëmarrësve në trafik që të respektojnë rregullat dhe dispozitat e komunikacionit, me qëllim kontributin e përbashkët për rrugë më të sigurta./Telegrafi/