Mickoski: Sondazhet dëshmojnë rënien e opozitës, akuzat dhe fyerjet nuk po funksionojnë

Kryeministri Hristijan Mickoski tha sot se sondazhi i fundit, ku ai dhe OBRM-PDUKM-ja paraqiten dukshëm përpara opozitës, pasqyron mënyrën se si qytetarët e vlerësojnë punën dhe politikat e partive kundërshtare.

Pas inspektimit të punimeve përfundimtare në ndërtesat e muzeut në Kalanë e Shkupit, ai iu përgjigj një pyetjeje të gazetarit dhe i cilësoi rezultatet e sondazhit si lajm të keq për rivalët politikë.

“Ky është një lajm i keq për ata që zgjodhën të bëjnë politikë me gënjeshtra, shpifje, trillime, fyerje e të tjera. Kështu do të vazhdojë të jetë”, deklaroi kryeministri.

Mickoski u shpreh se qytetarët e njohin punën dhe sjelljen e opozitës dhe, sipas tij, kjo është arsyeja pse ajo po humbet mbështetjen.

“Ata do të vazhdojnë të bien, sepse qytetarët e dinë se si po vepron opozita jonë e sotme”, tha ai.

Sipas Mickoskit, opozita nuk paraqet zgjidhje dhe politika konkrete, por merret me kritika dhe akuza ndaj qeverisë.

“Ata që patën mundësinë për shtatë vjet, por e vodhën dhe e shkatërruan vendin, tani kanë mbetur vetëm të shpikin histori, të shpifin, të gënjejnë e të bëjnë gjëra të ngjashme. Do të vazhdojnë të humbasin derisa të bëhen krejtësisht të parëndësishëm në skenën politike”, theksoi kryeministri Mickoski.