Mickoski: Qeveria ka mandat katërvjeçar, por do t’i përgjigjet nismës së opozitës për zgjedhje

Hristijan Mickoski tha se ekzekutivi që drejton ka një mandat katërvjeçar dhe se fokusi kryesor është zbatimi i sa më shumë projekteve të premtuara, jo organizimi i zgjedhjeve të parakohshme parlamentare.

Gjatë qëndrimit në Komunën e Tearcës, kryeministri deklaroi se po punohet për përmbylljen e projekteve të lëna pezull prej vitesh, me qëllim përmirësimin e kushteve të jetesës për qytetarët.

Megjithatë, Mickoski nuk e përjashtoi zhvillimin e zgjedhjeve të parakohshme në rast se opozita e çon këtë çështje përpara në Kuvend.

“Nëse LSDM, Levica dhe BDI paraqesin iniciativë për zgjedhje të parakohshme parlamentare, atëherë ne si Qeveri do të japim përgjigjen përkatëse”, deklaroi ai.