Mickoski paralajmëron për trazirat në Evropë: Protestat janë të përditshme, pasojat mund të prekin edhe Maqedoninë

Gjatë akademisë ceremoniale për 23 tetorin, Ditën e Luftës Revolucionare Maqedonase, kryeministri Hristijan Mickoski shprehu shqetësimin se trazirat në Evropë dhe Ballkan mund të kenë pasoja edhe për Maqedoninë. Ai akuzoi gjithashtu një pjesë të opozitës se, të shtyrë nga interesa personale, mund të përfshihen në provokime politike.

Sipas Mickoskit, krahasimi me një fuçi baruti nuk vlen më vetëm për Ballkanin, pasi edhe Evropa po merr pamjen e një vullkani të trazuar. Ai tha se arsyes po i lihet gjithnjë e më pak hapësirë, ndërsa protestat dhe format e ndryshme të dhunës shihen çdo ditë si në Evropë, ashtu edhe në vendet fqinje.

Kryeministri u shpreh se veprimtaria e shërbimeve në Ballkan nuk ndërpritet asnjëherë. Në këtë kontekst, ai tha se nuk do ta befasonte ndonjë përpjekje për t’i bartur problemet e rajonit brenda Maqedonisë.

Mickoski paralajmëroi se mund të ketë palë që kërkojnë ta tërheqin vendin në problemet e tyre ose të sjellin në përditshmërinë e qytetarëve një pjesë të atmosferës që mbizotëron tek ato.

Duke iu referuar aktorëve politikë vendas, ai pretendoi se përfshirja e tyre në veprime të tilla mund të nxitet lehtësisht nga interesat personale. Sipas tij, disa përfaqësues të opozitës janë në gjendje të bëjnë edhe “mrekulli” në këmbim të parave dhe premtimeve të rreme për një post.

Në përfundim, Mickoski kërkoi më shumë ndërgjegjësim nga qytetarët dhe u bëri thirrje të mos bien pre e provokimeve apo çështjeve të ngritura artificialisht. Ai paralajmëroi edhe për ato që i cilësoi si tema etnike të zmadhuara në mënyrë të tepruar.